Дагъларин къанун
Дагъларин къанун
Дагълара зи масан тир
Кхьенвай туш къанунар.
Асиррай къвез хъсандиз
Агакьна – чаз акуна.
Са ктабни авай туш
Къанунрин вич чаз хвенвай.
Санайни чаз жагъай туш –
Зигьинда ам кхьенва.
Къулак цукIвар куматIа,
Къуншидихъни цIай жеда.
Эгер намус аматIа,
Вазни къуншид гьай жеда.
ИчIи туштIа садан кIатI,
Вални жуван пай гьалтда.
Гуда авай фан са кьатI,
Вахъни суьрсет агалтда.
Сада са кас яргъариз
Рекье хуьряй тваз жеда,
Гъил кьаз, хуьруьн жемятдин
КIвач а кIвалик кваз жеда.
Сад азарлу хьанва. Фад!
Хуьруьз акваз ам кIанда.
Декьикьада къведа къад,
Къуват амайди чанда...
