Рекье авайла суннатар авун герек яни?

Суал: Са бязибуру сеферда (рекье) авайла суннат-кпIар тавуртIани жеда лугьуз тестикьарзава. Ибур дуьз гафар яни?

Жаваб: Ваъ, дуьз гафар туш. АкI лугьузвайбур чеб Шариатдикай хабар авачирбур я. Абурун гафар кьуд мазгьабдикай гьич садавни кьадайбур туш. Кьуд мазгьабдани а кпIар авун суннат я, абур авунай еке суваб ава. Имам аль-Гъазалиди вичин «Игьяъ» ктабда кхьизва: «Сефердиз килигна вуна жуван суннат-кпIар акъвазармир. Сефердикай жезвай хийирдилай ваз а кпIар тавуна хьайи зиян пара жеда».

Сеферда авайла ферз кпIар сад-садал хкидай (жам’) ва куьруь (къаср) ийидай ихтияр ава, и кар гьар сада вичин гуьгьуьллувилелди ийизва. Амма гьа идал бинеламиш хьана суннат-кпIар авун лазим къвезвач лугьун – им Шариатдин гъавурда тахьунин нетижа я. Сеферда авайлани суннат-кпIар акъвазар тавун патал Шариатди абур улакьда (деведал, балкIандал) ацукьнавайлани ийидай ихтияр ганва. Аллагьдин Расулди ﷺ сеферда авайла деведал ацукьнавайлани суннат-кпIар тадачир.

Имам Шафииди Жабиралай ихьтин гафар гъизва: «Заз деведал ацукьна суннат-кпIар ийизвай Аллагьдин Расул ﷺ акуна».

Абу Давуда хабар гузва: «Сеферда аваз суннат-капI ийиз кIан хьайила, Аллагьдин Расулди ﷺ вичин деве Кьибледихъ элкъуьрдай ва «Аллагьу Акбар» лагьана кпIунив эгечIдай».

Имам Бухариди лугьузва: «Аллагьдин Расулди ﷺ суннат-кпIар деведаллаз ийидай, фарз кпIар авун патал ам адалай эвичIдай».

Имамар тир Бухаридини Муслима Ибн Умаралай ихьтин гьадис гъизва: «Аллагьдин Расулди ﷺ деве гьинихъ элкъвейтIани адал ацукьна суннат-кпIар ийидай».