Крарин хуьре мавлид-межлис

Крарин хуьре мавлид-межлис

И мукьвара Докъузпара райондин Крарин (Каракуьре) хуьре еке мавлид-межлис кьиле фена. Мярекатдал диндин чирвилерихъ ва берекатдихъ вил галай гзаф кьадар мусурманар кlватl хьанвай. Ам хуьруьн агьалийри РД-дин Муфиятдин ва Докъузпара райондин регьбердин куьмекдалди Сулейман Керимован, адан хизанрин сагълугъдай тешкилнавай.

Межлисдал Докъузпара райондин кьил Шамилов Мегьамед, Кьиблепатан Дагъустанда РД-дин Муфтиятдин векил Алиханов Шамил, Дербент шегьердин са мискlиндин имам Пириев Магьмуд, Дербент райондин Хазар хуьруьн имам Рамазанов Къурбан, Белиж хуьруьн имам Гьабибов Ризван рахана. Абуру гьуьрмет-хатурдикай, диндин мярекатрикай авай хийирдикай, диде-бубадиз гьуьрмет авунин фазилатлувиликай, веледриз диндин тербия гунин важиблувиликай, гьаждин лайихлувиликай вязер гана.

Мярекат Докъузпара райондин имам Шамилов Узаира кьиле тухвана.

Насигьатрин арайра Заур Салигьова гуьзел нашидар-мавлидар кlелна.

Эхирдайни межлисдал кlватl хьанвайбуру вири мусурманриз хийир-дуьаяр авуна.

Къуй Аллагьди ﷻ и межлис кьабулрай ва чи лезги вири хуьрера ихьтин мярекатар кьиле фидайвал авурай! Амин.