Санал кIватI хьана зикир авун бид’а яни?
Санал кIватI хьана зикир авун бид’а яни?
Санал кIватI хьана Аллагьдиз зикир авун (Аллагь рикIел гъун) – им Мугьаммад Пайгъамбардин () девирдилай башламишна чи йикъарал къведалди мусурманар яшамиш жезвай дуьньядин вири пипIера ийизвай кар я. Санал гьалкъада ацукьна зикир авунин лайихлувилерикай гзаф гьадисра лагьанва.
Чна инал Муслимани Бухариди агакьарнавай гьакъикъи гьадисдин мана гъида. Абу Гьурайрадиз Пайгъамбардивай ﷺ ихьтин гафарин ван хьана: «Аллагь Тааладихъ чилерал зикир ийизвай межлисрихъ къекъвезвай малаикар ава. Ахьтин межлис жагъайла, чпин луварни ахъайна абур къерехривай ацукьзава, межлис элкъуьрна кьазва. Малаикри межлис алай чкадилай цаварал кьван авай чка михьиз ацIурзава. Зикир авуна куьтягь хьайила, абур цаварал хъфизва. Аллагь Таалади абурувай, Вичиз абур гьина авайтIа чизватIани, хабар кьазва: «Куьн гьина авай?» Малаикри жаваб гузва: «Чун чилерал Ваз тагьлил ийизвай, Вун рикIел гъизвай ва Ви тIвар виниз акъудзавай Ви лукIарин патав гвай».
Зикирдин межлисар инкарзавайбуру лугьузва хьи, бес винидихъ гъанвай гьадисда ихтилат илимдинни гьадисрин межлисрикай физва. Абурун фикирар таб тирди «…Ваз тагьлил (яни зикир) ийизвай…», лугьудай гафари субутзава. «Тагьлил» - им «ля илагьа илля-л-лагь» лугьун я.
Исламда авай вири хъсан шейэр чукIуриз кIанзавай, амма чпи дин цIийивилерикай михьзавайди я лугьуз тестикьарзавай ягъалмишбур дуьньяда хьун аламатдин кар тушни бес?! Исламдин гуьрчегвал чукIурунилай гъейри зурба бид’а жедани мегер?
