Раби уль-авал айны сыйладылар
Раби уль-авал айны сыйладылар
Уьстюбюздеги йылда бир керен гелеген раби уль-аввал айны сыйлап, гьар бусурман яшавунда аз-кёп буса да яхшы амал этмекни гьайында.
Пайхаммарыбызны ﷺ гьюрметлеп, Къызылюрт шагьарда жума межитни янында ол оьзюню яшавунда къоллагъан опуракъланы, аякъгийимлени ва башгъа тюрлю алатланы къаршыладылар. Сентябр айны 18-нден 20-сына ерли шогъар байлавлу мунда выставка да оьтгерилди.
Выставканы онгарывда анадаш халкъыбызны вакиллери де оьз къошумун этди. Шолай гьалда къол ялгъагъанланы арасында Темиравул юртдан Сайпутдин ва Гьамзат Жакъавовланы, Яхсай юртдан Артур Акъавовну ва Ислам Шихалиевни, Стальский юртдан Гьанипа Мамаевни ва Уллубий Жамаевни, Солтан-Янгыюртдан Солтанали ва Адил Гьажаматовланы, Къызылюрт шагьар администрациясыны янындан Алмаз Бековну, агъа-инилер Гьажи ва Абдурагьман Бамматовланы гьаракаты гёрмекли.
Гьамзат Жакъавовну сиптечилигине гёре, выставканы оьтгермек учун гьазирлик гёрювге байлавлу 150 минг манатны къадарында акъча мая жыйылды.
Раби уль-аввал айда инсаплы гьалда рагьмулу болмакъ да эдепни бир къылыгъыдыр деп ойлайман. Къызылюрт шагьарда республикабызны шагьарларындан ва районларындан чыгъып яшайгъан къумукълар да бар. Ювукъ арада ерлешген юртланы жамиятыны атына да разилик сёзлер билдирме сюебиз.
Бойнуна алып, бу инсаплы ишни ахырына ерли чыгъаргъан Гьамзат Жакъавовну атына къумукъ жамиятны атындан баракалла билдире туруп, алты санына савлукъ ёрама сюебиз.
