Къуръандин «аль-Ан`ам» сура
Мергьяматлу (и дуьньяда виридаз), Регьимлу (анжах иман гъанвайбуруз эхиратда) Аллагьдин тIварцIелди.
- (Вири) Шукур хьуй Аллагьдиз, Вичи цавар ва чил халкь авур ва мичIивални экв яратмишай. Амма ахпа (вири лишанриз ва аламатриз килигни тавуна) кафирри чпин Раббидихъ галаз барабар ийизва (Адан махлукьатар – абуруз ибадат ийиз).
- Ам – куьн (куь буба Адам) чепедикай халкь Авурди ва (квез) вахт (рекьидай) тайин авурди я. А тайин авунвай вахт (кьиникьин, чан хкунин ва дуьньядин эхир алукьунин) анжах Адаз малум я. Амма куьне адалай кьулухъни шак гъизва (чан хкунин гьакъикъивилел). (Аятдин гафба-гаф манадай къвезвайвал, гьар са инсандиз кьве вахт тайин авунва: абурукай сад – ам рекьидай вахт, муькуьди – чан хкунин вахт. Гьаниз килигна, мана ихьтинди жеда: «Аллагь Таалади куьн рекьидай вахт тайин авунва, амма дуьньядин эхир мус жедатIа, квез лагьанвач. Рекьидай вахт чизвачтIани, бязи лишанралди, уьмуьрдин юкьван яргъивал гьисабдиз къачуна, ам мус алукьдатIа, фикир авуртIа жеда. Амма дуьньядин эхир мус алукьдатIа, анжах Аллагьдиз ﷻ чизва»).
- Ам – цаварал ва чилел (Вичиз ибадатзавай) Аллагь я. Адаз куьне чуьнуьхзавай ва дуьздал акъудзавай вири чизва ва куьне къазанмишзавай вири чизва (ва адаз килигна гьар садаз эвез хъийида).
- Абурун Раббидин гьар са аламат, абуруз (бутпересриз) атай, абуру гьамиша кьабулзавачир.
- Абуру чпиз атай гьакъикъат (Къуръан) таб яз гьисабна. Амма абуру квекай зарафатар авунатIа, абурун нетижаяр абурал аватда.
- Абуруз акуначни кьван, чпел къведалди авай гьикьван несилар (халкьар, гьукуматар ва медениятар) Чна терг авунатIа? Чна абуруз чилел гзаф мумкинвилер гана, квез тагай хьтин. Чна абуруз цавай (бул) марфар ракъурна ва абурун кIаникай (абурун кIвалерин патавай) вацIар ракъурна. Ахпа Чна абур чпи авур гунагьрай терг авуна ва абурулай кьулухъ маса несилар халкь авуна (халкьар ва умматар).
- Гьатта Чна ваз Ктаб чарчел кхьена ракъурнайтIани ва абуру (ам ракъурнавайди чпин вилералди акунайтIани) адак гъилер хкIунайтIани, имансузри (терсвиляй) гьикI авуртIани лугьудай: «Им – ачух суьгьуьрчивал я».
КьатI ама.
