Пак калам

Сура аль-А`раф (Манийвилер)

эвел алатай нумрайра

196. Гьакъикъатда, зи арха – Аллагь я, (паяралди) Ктаб ракъурай. Ада (неинки са пайгъамбарриз, гьакI вири) авлияйриз архавалзава.

197. Адалай гъейри низ куьне ибадат ийизватIа, абурувай квез куьмек гуз жезвач. Абурувай гьатта чпивай-чпиз куьмек гуз жезвач (абур лап тамам къуватсуз я)».
198. Эгер куьне абуруз (а чан алачир затIариз, куьне ибадат ийизвай) гьакъикъатдихъ эверайтIа (гьикI мусурманри дуьаяр ийиз Аллагьдивай тIалабзаватIа), абуруз ван къведач. Ваз акваза, гьикI абур (бутар, вуна абуруз ибадат ийизвай) ваз килигзаватIа (тапан вилералди), амма абуруз са затIни аквазвач.
199. (Я Мугьаммад) КIевивал ийимир (инсанриз), хъсан крарихъ эвер це ва авамрихъай элкъуьгъ (абурун эдебсуз крариз гьа чпин саягъда жаваб тагуз).
200. Эгер шейтIанди ваз футфа гуз (алахъиз) хьайитIа, Аллагьдивай жув хуьн тIалаб, гьакъикъатда, Ам – Ван Къвезвайди (ви куьмек гунин тIалабунрин), Чизвайди (вун гьихьтин гьалда аватIа) я.
201. Гьакъикъатда, эгер Аллагьдихъай кичIебурухъ (чеб къадагъа крар авуникай хуьзвай) шейтIандин футфа хкIаз хьайитIа, абуру (Аллагьдин эмирар ва къадагъаяр) рикIел хкизва ва абуруз акваз башламишзава (шейтIандин ракьар аквазва ва абурукай къутармиш жезва, адан писвиликай азад хьана).
202. Чпин (имансуз) стхаяр абуру (шейтIанри) ягъалмиш рекьяй ракъурзава, адалай кьулухъ абур акъваззавач (гунагьар авуникай, Аллагьдихъай кичIебуру кьил къакъудзавай).
203. Эгер вуна (я Мугьаммад) абуруз лишанар (аламат, абуру истемишзавай) къалур тавуртIа, абуру хабар кьада: «Вучиз вуна ам фикирна жагъурнач (гьикI амай вири фикирна жагъурнатIа)?» Жаваб це (абуруз): «(За аламатар ва Къуръандин аятар фикирна жагъурзавайди туш) Зун анжах зи Раббиди вагьйуда зи кьиле твазвайдан гуьгъуьна аваз физва. Им (Къуръан) – куь Раббидин патай делил (квез ракъурнавай ва гьакъикъат къалурзавай), дуьз рехъ къалурдайди ва иман гъанвайбур патал регьим я».
204. Къуръан кIелзавайла, адаз (дикъетдалди) яб це ва кисна акъваз, квез регьим ийидайвал.
205. Аллагьдиз зикир ая рикIик зурзун кваз (ва кьабулунихъ умуд аваз) ва кичIевал аваз (ви дуьаяр кьабулдач лагьана) явашдиз, кIевиз ваъ, - пакамаз ва няниз. Къайгъу авачирбурукай жемир (капI ва Аллагьдиз зикир авун рикIелай алудзавай).
206. Гьакъикъатда, ви Раббидин патав гвайбуру (месела, мукьва авунвай вини дережадин малаикри) Адаз (Аллагь Тааладиз) ибадат авун такабурлувилелди фикир тагана тазвач. Абуру Адалай тарифар ийизва (зикирдалди, ада Ам михьи тирди ва гьар гьи нукьсандикай хьайитIани кьадар авачир кьван яргъа тирди къалурзава) ва Адаз саждаяр ийизва.

Сура «аль-Анфаль»

«Аль-Анфаль» дяведа душмандивай гьатай шейэр я (трофеи).

Мергьяматлу (виридаз и дуьньяда), Регьимлу (анжах иман гъанвайбуруз эхиратда) Аллагьдин тIварцIелди.

1. Абуру (асгьабри, Бадрдин женгина трофеяр къачур) вавай (я Мугьаммад) трофейрикай (абур гьикI дуьз пайдатIа) хабар кьазва. Жаваб це: «Трофеяр Аллагьдин ва Адан Пайгъамбардинбур я». Аллагьдихъай кичIе хьухь ва сада-садахъ галаз рафтарвилер къайдада тур. Аллагьдиз ва Адан Пайгъамбардиз муьтIуьгъ хьухь, эгер куьн (дугъриданни) иман гъанвайбур ятIа (куь иманди куьн муьтIуьгъвилихъ ракъурда).
2. Гьакъикъатда (халис) иман гъанвайбур – ибур а ксар я хьи, нин рикIери Аллагьдин тIвар кьурла кичIевал синемишзаватIа. Абурун иман (ва инанмишвал) гужлу жезва, абуруз Адан аятар кIелайла. ГьакIни абуру (анжах) чпин Раббидик умуд кутазва (чпин вири крар Адал ихтибарна).
3. Абуру (тамамдиз) капI ийизва ва харж ийизва (Чи рекье) Чна абуруз ганвайдакай (мал-девлетдикай).
4. Абур – гьакъикъи иман гъанвайбур я. Абуруз – дережаяр (кьакьан чкаяр) абурун Раббидин патав, гъил къачун (авур гъалатIрилай, инсанриз хас тир) ва бул паяр (Женнетдин няметрин тегьерда).
5. ГьакI ви Раббиди вун акъудна (Бадрдин женгиниз) кIваляй (Мединадай) гьакъикъат патал (гьакIни дуьз ва гьа са вахтунда чарасуз мурад патал), иман гъанвайбурукай бязибуруз а кар кIанзавачиртIани. (Амма нетижада абуру гьихьтин чIехи гъалибвал къачуна!)
6. Абуру (трофеяр авай карвандал гьужумиз кIанз) вахъ галаз гьуьжетар ийизвай гьакъикъатдин (бутпересрин чIехибуруз яшамиш жедай чка ганвайбуруз акси яз ийизвай дяведин) патахъай, ам ашкара хьайидалай кьулухъ (Чи вагьйуяр ва вуна гъавурда тун себеб яз, гьар гьина хьайитIани абуруз гъалибвал ва агалкьун жедайди) – а саягъда хьи, на лугьуди абур рекьидайвал ракъурзава, абур лагьайтIа, килигзава (кьиникьин вилериз).
7. Ингье Аллагьди квез гаф гана, кьве дестедикай сад куьне дуьз къачуда (карвандик квай са шумуд кас, я тахьайтIа карвандиз куьмек яз атанвай кьушун). (Бутпересрин регьберар квай чIехи кьушундал гъалибвал къачунин паталай) Квез кIанзавай, квел зайифбур гьалтна (пис яракьламиш тир карван). Амма Аллагьдиз дуьздал акъудиз кIанзава (ва виниз акъудиз) гьакъикъат Вичин гафаралди (а вахтунда Ада вагьйу яз ракъурай); (квез чIехи кьушундихъ галаз дяве авун эмирна) ва кафирар терг ийиз.
8. (Эхь! Аллагь Тааладиз гьакI кIан хьана) Гьакъикъат (Ислам) тестикь ийидайвал ва таб (имансузвал) терг ийидайвал, гьатта ам тахсиркарриз (бутпересрикай тир) такIан ятIани.
9. Ингье куьне куь Раббидивай куьмек тIалабна ва Ада квез жаваб гана (куь дуьадиз): «За квез агъзур малаикдалди куьмек гуда, сад-садан гуьгъуьна аваз физвай» (Бадрдин женгинин юкъуз Аллагьдин Расулдиз ﷺ акуна хьи, бутпересар агъзур кас кьван авай, асгьабар лагьайтIа – пуд вишни цIуд кас кьван. А вахтунда ада Аллагьдивай яргъалди ва гзаф куьмек гун тIалабна ва Аллагьди и аят ракъурна).
10. Аллагьди а кар (квез куьмек яз малаикар ракъурун) анжах шад хабар яз авуна, куь рикIер секинарун патал, ва (гъалибвал малаикри гъана лагьана фикирмир) куьмек – анжах Аллагьдин патай я (гъалибчи лагьайтIа – Аллагьдин куьмекдиз лайих хьайиди я). Гьакъикъатда, Аллагь – Лайихлуди, Арифдарди я.
11. Ингье Ада куьн сустарна, куьне куьн хатасузвиле гьиссдайвал, ва квез цавай яд ракъурна, адалди куьн михьдайвал ва квелай шейтIандин чирк алуддайвал (куьн цихъ къаних хьана рекьида лугьудай адан футфа гунин), ва куь рикIер мягькемардайвал (абур сабурдай, дурумлувиляй ва гьакIни Аллагьдин куьмекдихъ кIевиз агъунай ва инанмишвиляй ацIурна) ва идалди (дяведин майданда) куь кIвачер (къумада акIизвай) мягькемарун патал.
12. Ингье ви Раббиди малаикриз вагьйу авуна: «Зун – квехъ гала (квез куьмек гузва). Иман гъанвайбур мягькемара (инсанрин къаматда аваз атана ва шад хабар гъана, абурун кьадар артухарна ва дяведа иштиракна)! Имансузрин рикIера За кичI твада. (Куьне лагьайтIа) Абурун (имансузрин) кьилер атIутI ва абурун тупIар атIутI».
13. Им (имансузар магълуб хьун) – абур Аллагьдиз ва Адан Пайгъамбардиз акси яз къарагъунай. Вуж Аллагьдиз ва Адан Пайгъамбардиз акси яз къарагъайтIа (ам гьикI хьайитIани жазаламишда), гьакъикъатда, Аллагьди кIеви жаза гуда.
14. Ингье квез (куь жаза)! Дадмиша ам (исятда и дуьньяда)! Гьакъикъатда, (дуьньядин жазадилай гъейри) имансузриз – Жегьеннемда жаза гуда.
15. Эй, иман гъанвайбур! Квел женгинин майданда кафирар гьалтайла, абурухъ далу элкъуьрмир (къулухъ чIугваз).
16. Ни а юкъуз (кафиррихъ галаз дяве ийизвай) кафиррихъ далу элкъуьрайтIа (ва дяведин майдандилай катайтIа) – элкъвезвайбурулай гъейри (авайдалай хъсан чка кьун патал) дяве авун патал ва я (кьилин) дестедихъ агалтун патал (месела, кьулухъ чIугвазвай амалар ийиз, амма гьакъикъатда лагьайтIа, генани къуватлу дестедихъ агалтиз) – абуру чпел Аллагьдин ажугъ гъизва ва абурун чка Жегьеннем жеда! Ахьтин нетижа акьалтIай писди жеда!
17. Куьне кьенач абур, абур Аллагьди кьена! Вуна гадарнач (абурун патахъ са гъапа авай къум, абурун гьар садан вилериз фена), гадардайла, Аллагьди гадарна (вучиз лагьайтIа инсанрин вири крар Аллагьди халкьзава). Им а кар патал я хьи, Ада (куь Раббиди) иман гъанвайбуруз Вичин патай хъсанвал гудайвал. Гьакъикъатда, Аллагь – Ван Къвезвайди, Чизвайди я.
18. Ингье ам (иман гъанвайбуруз ганвай регьим)! Гьакъикъатда, Аллагьди кафиррин чинебан чIуру къастар зайифарзава.

КьатI ама

«Калям шариф» (Къуръандин манайрин таржума) ктабдай