Куьмек це, я Аллагь ﷻ
Дагъустан
Зи Дагъустан, зи хайи ватан,
Цин кӏаник вун акатнава.
Чи рикӏериз я вун багьа,
Тӏалабзава, фад секинвал жагъура.
Сад хьанва дагъни-аран,
Ахвар амач, квахьнава иви.
Халкь сад хьана цӏийи кьилелай,
Умудзава стхавални хъсанвал.
Чун Дагъустанвияр - чи къуват,
Садвал рикӏерин, хъсан акьул.
Чи дин-иман, чи шагьидвал,
Сад Аллагьди азад авурай.
Дагъустандин халкь шад ая,
Чи иви, чи хизан, чимивал.
Я Аллагь, кӏвалера хъвер-шадвал,
Я Аллагь, вири гьалар хъсан хьурай.
Пака хьурай, хьурай аламат,
Вун къудратлу я, куьмек це, я Аллагь.
Куьмек жеда тек ви шафакъат,
Я Аллагь, кьабула чи дуьаяр.
Ви регьимдик чи умуд ква.
Кӏан я михьун къамат чилин,
Къуьн-къуьневаз чна куьмек гана,
И къуватдалди барбатӏ хьана.
Мягькем хьухь, викӏегь хьухь, зи ватан,
Лап рикӏивай кӏанда чаз вун, ватан.
Чун вири сад хъжеда, сад хъжеда зи ватан,
Хкин инсанар гьар вичин кӏвализ.
Диана Гаджиева
Лезги чӏалаз элкъуьрайди
Мурад Тагирбеков
07.04.2026 йис
Кьудар
Ажалдикай фикир тийиз инсанри,
КIватIда девлет яшайиш худ хъсанриз.
Физва къаст гваз лувараллаз умудрин,
АватIани чеб жергеда мугьманрин.
***
РикIиз такIан суьрет гьар къуз аквадалди,
Бед амалар эхиз тежез дакIвадалди,
Кьил вахтунда баштан авун хъсан я,
Жуван сагъ кьил къванцин цла акьадалди.
***
Хьанвач чириз сирер яргъи уьмуьрдин,
АватIани адахъ атир суьгьуьрдин.
Са кьин квачиз авач уьзуьр дармансуз,
Жагъуриз хьун дережа я гьуьндуьрдин.
***
Халкьдин вилик марифатдин ктаб гъун,
Бед вахтунин суалриз дуьз жаваб гун,
Кепекдай я, кьабулдай кас тахьайтIа,
Амукьдайди я са жуваз азаб гун.
***
Нагъвар кIватIиз тваз хьайила харада,
ЦIай къачуда, хьайитIани кьарадал.
Кьуру гафар кIватIун кьиле герек туш,
Тегъизвайла къени крар арадал.
***
ЛукIвал кьабул мийир, инсан, уьмуьрда,
Инсанвилин чIехи тIвар хуьх гьуьндуьрда.
Азадвилин гар кьабула, мелгьем хьиз,
КIулацвили намусдин экв туьхуьрда.
***
ТIалаб мийир михьивал, жув кьацIанваз,
Туьтуьнихъ кьван кьарада жув акIанваз.
Гьар са карда чешне хьайла хкаж кьил,
Сес хкажмир гьарамрив хук ацIанваз.
***
Пехилвилихъ хасаратвал галачтIа,
Акъажунрихъ кьулухъ хъфин авачтIа.
Бягьсер чIугу, арш рам авун паталди,
Акъваз, эгер къуват – суьрсет амачтIа.
***
ЗатIни авач и дуьньяда кьадар авачир,
Кьисмет аваз къвезва инсан къабар алачиз.
Кьадар течиз тIуьр ризкьини бес гьарам тушни?
Тахьуй инсан рикIе чирагъ, гатфар авачир.
***
Герек авач лайихсуз тир тарифар,
Къундарма яз туькIуьрзавай тарихар.
Крар кIанда бинедавай гьакъикъат,
Дуьзвал аку, кIандач
гъейри теснифар.
***
Алукьнавай йифел гъалиб хьунал жув,
Экуь тир югъ – кьисмет, сагьиб хьунал жув.
Шадвал ая рекьеватIа эгер дуьз,
Пак Ватандал кьару, гьабиб хьунал жув.
***
ТIебиатдин нямет инсан тирвиляй,
Адан паяр халкьдиз игьсан тирвиляй,
Уьмуьр хьиз заз кIанда, валлагь, тIебиат,
Жанлу алем дава–дарман тирвиляй.
***
ТIалаб мийир гъетеривай муъминвал,
Абур пак я, чидач табун, чиркинвал.
Акъваз ийин къаншарда чун гъетерин,
Къачудайвал абурувай экв, эркинвал.
***
Гьар затI къачуз интернетдай гьазуран,
Муьфте жагъай малдал я куьз къудуран?
Анжах жува гьасилайдал дамаха,
Авач садаз ваз гур акьул артухан.
***
ТIебиатдин чарх элкъвезва мад ва мад,
Ракъуриз зул, кьуьд,
гуьгъуьнлай гатфар, гад,
Тикрарзава гьар чIавуз хас къанунар,
Бес чахъ куьз жезвач къайдани
къанун сад?
***
Дердиниз на ая чара,
ВугузвачтIа, рикIи кьарай.
Руьгьдин эмир акъуд кьилиз,
Ашкъидикай ятIа гьарай.
***
Йифер-йикъар чна ийиз са-сад рам,
Физва пакад йикъак кутаз умудар.
Куьз я уьмуьр вилик вегьез тахьай кам?
Сирнав тийиз цавал хьайла булутар?
***
ИчIи кварар юзурналди,
Тугъни гъери гьасил жедач.
Руьгь яванбур машгьурналди,
Рехи рикIер жегьил жедач.
***
Дидевилин тIварцIихъ цIигел
Тушир кIвализ сусар татуй.
Марифатдин тIул тир кимел
Эдеб квахьай ксар татуй.
Мукаил Агьмедов
Фидач рикӏелай
Зи лезги чIал, хайи Ватан,
Алатдай туш мецелай.
ГъвечIизамаз хурухда кьур,
Диде фидан рикIелай.
Са бязибур маса чIалал
Рахазва гьа, чин тийиз.
Акъахнавай перем вичин
Бегьемвилел цан тийиз.
Са бязибур маларивни
Маса чIалал рахазва.
Им фитне туш ийизвайди,
Квезни а кар аквазва.
Са бязибур рахазвалда
Маса чIалал, чин тийир.
Нин тахсир я, зи лезги чIал
Вичин рикIе хуьн тийир.
ИкI жедани, азиз дустар,
Жуван хайи чIал течиз.
Урусдалди лугьуз гафар,
КIвализ хкир мал течиз.
Гьам Эмина, Сулеймана
Чи лезги чIал хвейид я.
Девлетлуяр гафаралди
Кавхани кваз кайид я.
Чи Сулейман Московдани,
Лезги чIалал раханай.
Теснифнавай шиирарни
Дидед чIалал лагьанай.
Зун лезги я, зи лезги чIал,
Ам гьамиша вине я!
Хайи Ватан! Дидедин чIал
Уьмуьрлух зи бине я!
