Эминхуьре диндин гурлу межлис
18-апрелдиз Стlал Сулейманан райондин Эминхуьруьн мискlинда диндин зурба мярекат кьиле фена. Межлисдиз «Дуьадин межлис» лугьудай тlвар гана, вучиз лагьайтlа и мярекатдал Дагъустан ва вири Россия Аллагьди ﷻ бедбахтвилерикай хуьн патал гзаф дуьаяр авуна.
Малум тирвал, алай йисан гатфариз чи республикадин халкьдал тlебии мусибатар атана. Къуръанда лугьузвайвал, абур инсанрин гунагьар себеб яз ва гьакlни ахтармишун яз къвезвайди я. Гьавиляй, сад лагьайди, чун гунагьар тийиз алахъна кlанда ва абур хьайитlа, гьасятда Халикьдивай ﷻ гъил къачун тlалабун лазим я. Кьвед лагьайдини, Аллагьди ﷻ чун хуьдайвал, чна Адаз Вичиз дуьаяр авуна кlанда. Пак Къуръанда икl лагьанва (мана): «Ва куь Раббиди лагьана: «Завай куьне тlалаб (эй, инсанар), За квез жаваб гуда»» («Гъафир» сурадин 60-аят). Гьаниз килигна дуьадиз Исламда еке къимет гузва ва гьатта ам мусурмандин яракь я лагьанва.
Диндин межлисда иштирак авун патал Эминхуьруьз Кьиблепатан Дагъустандин вири районрай диндар мусурман итимар, дишегьлияр мугьман хьана. Сифте экуьнин сятинин кlуьдаз мискlиндин юкьвал кlватl хьанвай итимри Шазали тlарикъатдин хатму (дуьадин межлис) кьиле тухвана. Гуьгъуьнлай сятинин цlудаз чlехи мярекат гатlумна. Ам адет тирвал Къуръандин аятар кlелуналди ачухна. Абур Стlал Сулейманан райондин Вини Стlалрин имам Гьамидов Ислама кlелна. Гьакlни Ислама насигьатрин арайра ширин сесиналди мавлидар-нашидар лагьана.
Мярекат Кьурагь райондин имамрин председатель Аливердиев Абубакра кьиле тухвана.
Сад лагьай гаф инал Дербент шегьердин имамрин председатель Бабаев Агьмадаз гана. Ада некягьдин важиблувиликай насигьат авуна. «Некягь – им Аллагьди ﷻ чаз къалурнавай аламатрикай сад я. Къуръанда лагьанва (мана): «Адан (Аллагьдин ﷻ) аламатрикай сад – им квез (итимар) квекай (Адаман пакунин тlвалуникай) папар (Гьава диде) халкь авун я. Квез абурай секинвал жагъидайвал (абурухъ галаз куь рикlер секин жедайвал). Ва куь арада (Ада) муьгьуьббатни регьим туна. Фикир ийидайбур патал и карда аламатар ава» («Ар-Рум» сурдин 21-аят). Мугьаммад Пайгъамбар ﷺ вич эвленмиш хьайиди я. Ада лагьана: «Некягь – зи Сунна (рехъ) я. Вуж зи Суннадихъай элкъвейтlа, ам зи гуьгъуьнаваз физвайбурукай туш» (Тирмизи, Ибн Мажагь)», - къейдна Агьмад гьажиди.
Гуьгъуьнлай Дагъустандин Муфтиятдин председателдин куьмекчи Омаров Шамил рахана. «И мукьвара Дагъустандин халкь Аллагьди ﷻ бедбахтвилералди ахтармишна. Бязибуру ам Халикьдин ﷻ жаза я лугьузва. Абур инсанар имансузвиле, мушриквиле ва гунагькарвиле тахсурлу ийиз гьерекатзавайбурун жергедай я. Ам жаза яни, тахьайтlа имтигьан анжах сад Аллагьдиз ﷻ чизва. Мумкин я ам жаза хьун, чи гунагьар себеб яз атанвай. Четинвилер атай чlавуз мусурманди сабур авурла, абурулай гъил къачузва. Гьаниз килигна, мад чун михьи авун патал Аллагьди ﷻ чаз абур ракъурзава. Мумкин я, Аллагьди ﷻ Дагъустан ахтармишзава, чи халкьдин дережа хкажун ва ам сад авун патал. Чун гьа и садвилин шагьидарни хьана, шукур хьурай Аллагьдиз ﷻ. Неинки Дагъустандин агьалийри, гьакl чи гьукуматдин жуьреба-жуьре шегьеррин ва хуьрерин халкьарини четин гьалда авайбуруз хийир-дуьаяр авуна, чпивай жедай куьмекар гана», - къейдна Шамил гьажиди.
Ахпа Агъул райондин имамрин председатель Рамазанов Къурбаназ гаф гана. Ада акьалтзавай несилдиз диндин тербия гунин важиблувиликай насигьат авуна. «Чун къе и межлисдал кlватl хьанва, вучиз лагьайтlа чаз адан къиметдикай хабар ава, амма чахъ чи веледар галач. Гьабур дуьз рекьел эциг куьне. Бес гьикl диде-бубади абуруз Ислам чиррай, гьа са вахтунда чпихъ диндин чирвилер авачирла?! Гьакl хьайила, аялар Исламдин чирвилер гузвай медресайриз ракъурун лазим я. «Бес абуру вуч неда?» - лугьуз жузазва. Вири махлукьатриз ризкьи гун Аллагьди ﷻ Вичин хивез къачунва. Куьн инанмиш тушни? Къуръанда гьакl лагьанва хьи. Гьич са имамни я хизан, я улакь, я кlвал авачиз амукьнач. Гьатта абурал бязибур пехил жезва (абуруз гьинай къвезвайди я лугьуз). Гьакl хьайила, эгер вун ви веледдин къайгъуда аватlа, кlуьд ва я цlусад лагьай класс акьалтlарайдалай кьулухъ ам диндин чирвилер къачуз рекье тур. Икl вуна ви хиве авай буржи акъудда», - къейдна Къурбан гьажиди.
Гьакlни инал Кьиблепатан Дагъустанда РД-дин Муфтиятдин векил Раджабов Мугьаммадрамазан рахана. Ада Аллагь ﷻ кlан хьунин ва Ам рикlел гъунин (зикир авунин) важиблувиликай вяз гана. «Гьикьван инсан кlевиз, рикlин сидкьидай Аллагьдихъ ﷻ инанмиш жеда, гьакьван адаз Ам кlан жеда. Иман кlеви авун патални мукьвал-мукьвал зикир авун лазим я. Кьилди са чкада ацукьна Аллагь ﷻ рикlел гъун, Халикьдихъ ﷻ галаз рахун виридалайни хъсан я. Тахьайтlа чун инсанри ва я маса шейэри машгъуларзава. Къуй Аллагьди ﷻ чаз гьахьтин мумкинвал гурай», - къейдна Мугьаммадрамазан гьажиди.
Эхирдайни Стlал Сулейманан райондин имамрин председатель Рагьманов Шамилаз гаф гана. Ада межлисда иштирак авурбуруз, адак пай кутурбуруз виридаз чухсагъул лагьана. Гьакlни ада Дагъустан, Урусат ва мусурман вири гьукуматар Аллагьди ﷻ хуьн патал Халикьдивай ﷻ ван алаз араб чlалалди тlалабна, кlватl хьанвайбуру амин (жаваб це, я Аллагь ﷻ) лагьана.
Гьа и хийир-дуьадалди межлис акьалтlарна ва вирида санал мискlинда нисинин капl авуна. Мярекатдилай хъфидай чlавуз кlватl хьанвайбуруз виридаз чими хуьрек ва чай гана.
Къуй Аллагьди ﷻ кьабулрай и берекатлу межлис, ам себеб хьана чун ва чи кlанибур вири писвилерикай хуьрай! Амин.
