Мугьаммад Ярагъидин 250 йис
14-декабрдиз Мегьарамдхуьруьн райондин Мегьарамдхуьруьн медениятдин кIвале чи лезги халкьдин дамах тир шейх Мугьаммад Ярагъидин 250 йис хьуниз талукьарнавай мярекат кьиле фена.
Пак Къуръандин аятар кIелуналди ачухай межлисда гзаф кьадар мусурманри иштиракна.
Ахпа Мегьарамдхуьруьн райондин регьбер Агьмедов Фаридаз гаф гана. Ада кIватI хьанвайбуруз мярекат мубаракна ва ам тешкилунай РД-дин Муфтиятдиз ва РД-дин милли сиясатдин министерстводиз чухсагъул лагьана.
Гуьгъуьнлай Дагъустандин Муфтийдин куьмекчи Мегьамедов Агьмад, Кьиблепатан Дагъустанда РД-дин Муфтиятдин векил Гьажиев Гьуьсейн, Ставрополь шегьердин гьукуматдин Думадин депутат Агъаларов Казбек, СтIал-Сулейманан райондин имамрин Советдин председатель Омаров Шамиль, Дагъустандин ЦIаяр шегьерда авай Мугьаммад Ярагъидин тIварцIихъ галай медресадин регьбер Рамазанов Мугьаммадариф, Йемендай тир Къуръандин гьафиз Агьмад аз-Зубажи, тарихчи Дадаев Мурадуллагь, Мегьарамдхуьруьн райондин имамрин Советдин председатель Сефиханов Алихан рахана. Абуру Мугьаммад Ярагъидин уьмуьрдикай, Вини Ярагъдал эциг хъийизвай мискIиндикайни медресадикай, хъсан къилихрин фазилатлувикай, Мугьаммад Ярагъиди кьиле тухвай тасаввуф илимдин важиблувиликай ва мусурманар сад хьуникай насигьатар авуна.
ГьакIни межлисдал Заур Салигьова Мугьаммад Ярагъидикай гуьзел нашид кIелна.
Эхирдайни кIватI хьайибуру вирида санал вири мусурманрин хушбахтвал патал хийир-дуьа авуна. Къуй Аллагьди ﷻ кьабулрай!
