Аллагьдивай ﷻ гъил къачун тlалабунин важиблувал
Аллагьдивай ﷻ гъил къачун тlалабунин важиблувал
1. Ибн Аббаса агакьарайвал, Аллагьдин Расулди ﷺ лагьана: «Ни гьамиша гъил къачун тIалабиз хьайитIа, Аллагьди ﷻ адаз гьи четин гьалдай хьайитIани экъечIдай рехъ къалурда ва гьи пашманвал хьайитIани адаз кьезиларда ва адаз вичин ризкьи, ада гьич гуьзлемиш тийизвай чкадай ракъурда» (Абу Давуд).
- Ибн Масуда агакьарайвал, Аллагьдин Расулди ﷺ лагьана: «Ни лагьайтIа: «За Аллагьдивай ﷻ гъил къачун тIалабзава, Вичелай гъейри маса худа авачир, Чан Алай, Гьамишалугъ Тир ва за Адаз туба ийизва» (Астагъфиру-Ллагьа-ллязи ля илягьа илля гьува-ль-Гьаййа-ль-Къаййума ва атубу иляйгьи), - адан гунагьрилай гъил къачуда, гьатта ам дяведин вахтунда гьужумдайла женгинай катнатIани» (Абу Давуд, ат-Тирмизи ва аль-Гьаким).
- Шаддад бин Авса агакьарайвал, са сеферда Аллагьдин Расулди ﷺ лагьана: «Аллагьдивай ﷻ гъил къачун тIалабунин дуьайрин агъа Адан лукIран ихьтин гафар я: «Я Аллагь, Вун – зи Рабби я ва Валай гъейри маса худа авач; Вуна зун халкьна ва зун Ви лукI я, за Ваз гайи гафуниз зун вафалу жеда (яни за Вахъ инанмиш жез ва рикIин сидкьидай Ваз муьтIуьгъ жез давамарда), та заз къуватар бес жезмай кьван. За Вавай зун хуьн тIалабзава за авур писвиликай, Вуна заз авур регьимар за тестикьзава ва за зи гунагь хиве кьазва, залай гъил къачу, вучиз лагьайтIа, гьакъикъатда, Валай гъейри садани гунагьрилай гъил къачузвайди туш! (Аллагьумма, Анта Рабби, ля илягьа илля Анта, халякътани ва ана `абдука, ва ана `аля `агьдика ва ва`дика мастата`ту. А`узу бика мин шарри ма сана`ту, абуу ляка бини`матика `аляййа, ва абуу бизанби, фагъфир ли, фаиннагьу ля ягъфиру-з-зунуба илля Анта!) Ни и гафар юкъуз лагьайтIа, вичи лагьай гафарихъ инанмиш яз, ва гьа юкъуз няни жедалди кьейитIа, ам женнетэгьлийрин арада жеда, ва ни и гафар йифиз лагьайтIа, вичи лагьай гафарихъ инанмиш яз, ва гьа йифиз экв жедалди кьейитIа, ам женнетэгьлийрин арада жеда» (Аль-Бухари).
- Савбана лагьана: «КапI куьтягьайла, Аллагьдин Расулди ﷺ гьамиша пудра Аллагьдивай ﷻ гъил къачун тIалабдай ва ахпа лугьудай: «Я Аллагь, Вун – ислягьвал Гудайди я ва Валай ислягьвал къвезва, Вун шукур авуниз лайихлу я, я гьайбатлувилин ва жумартвилин Иеси!» (Аллагьумма, Анта-с-Саляму ва минка-с-саляму, табаракта, я За-ль-джаляли ва-ль-икрами!) И гьадис агакьарайбурукай сад тир аль-Авзаидивай хабар кьуна: «Аллагьдивай ﷻ гъил къачун патал гьикI тIалабун лазим я?» Ада лагьана: «Лагь: «Аллагьдивай гъил къачун тIалабзава, Аллагьдивай гъил къачун тIалабзава» (Астагъфиру-Ллагьа, астагъфиру-Ллагьа)».
- Аишади лагьана: «И дуьньядай фидайла Аллагьдин Расулди ﷺ иллаки мукьвал-мукьвал ихьтин гафар тикрарзавай: «Шукур хьуй Аллагьдиз ва Адаз тарифар хьуй, за Аллагьдивай гъил къачун тIалабзава ва Адаз туба ийизва!» (Субгьана-Ллагьи ва бигьамдигьи, астагъфиру-Ллагьа ва атубу иляйгьи!» (Аль-Бухари, Муслим).
- Анаса агакьарайвал, Аллагьдин Расулди ﷺ лагьана: «Аллагь Таалади лагьана: «Эй Адаман хва, гьакъикъатда, За валай гъил къачуда, вуна гьихьтин гунагьар авунатIани килиг тавуна акьван чIавалди, та вуна Завай куьмек тIалабзамай кьван ва Зак умуд кутазмай кьван (яни Зи регьимдик ва гъил къачуник умуд кутазмай кьван). Эй Адаман хва, эгер вуна цава авай циферив агакьдай кьван гунагьар авуртIани, ахпа Завай гъил къачун тIалабайтIа, За валай гъил къачуда! Эй Адаман хва, гьакъикъатда, эгер вун Зи патав саки вири чил ацIай кьван гунагьар гваз атайтIа, амма Захъ галаз санал маса са шейинизни ибадат тийиз хьайитIа (яни, анжах Сад Тир Аллагьдиз ибадат ийиз), За гьикI хьайитIани ваз багъишламишун багъишда ва ада вичелди вири гунагьар кIевда!» (Ат-Тирмизи).
- Ибн Умара лагьана: «Садра Пайгъамбарди ﷺ лагьана: «Я дишегьлияр, садакьа це ва мукьвал-мукьвал Аллагьдивай ﷻ гъил къачун тIалаб, вучиз лагьайтIа, гьакъикъатда, заз акуна хьи, ЦIун агьалийрин чIехи пай куьн тир!» Дишегьлийрикай сада жузуна: «Вучиз чун ЦIа гзаф жеда?» Пайгъамбарди ﷺ лагьана: «Куьне гзаф вахтара инсанар лянетламишзава ва куь гъуьлери авур хъсанвал квез чир жезвач, ва квекай акьул без тежезвайбурукай ва тамамдиз чпин диндин везифаяр тамамар тежезвайбурукай акьуллу инсандин акьул квелай гзаф ракъуриз алакьдай кас заз акунач!» А дишегьлиди (яни, Пайгъамбардиз ﷺ суал гайи дишегьли) хабар кьуна: «Акьул бес тежезвайди ва дишегьлийри дин тамамдиз тухун тийизвайди куь къалурзава?» Пайгъамбдарди ﷺ лагьана: «Кьве дишегьлидин шагьидвал са итимдин шагьидвилиз барабар тирда ва дишегьлиди са шумуд юкъуз капI тийизвайда (яни вацран кьилер авайла дишегьлидивай капI ийиз жезвач)» (Муслим).
Имам ан-Нававидин «Риязу-с-Салигьин» ктабдай
