Сив хуьнин сувар мубаракрай!
«Ассаламу алайкум ва рагьматуллагьи ва баракатугьу!
Играми стхаяр ва вахар! За квез алукьзавай сив хуьнин чIехи сувар рикIин сидкьидай мубаракзава.
И шад югъ вири мусурманар патал сив хуьнин, алава кпIар авунин, муьгьтежбуруз куьмек гунин ва гзаф маса крар авунин мумкинвал гунай ЧIехи Халикьдиз ﷻ шукур авунин чан алай шикил я.
И шукур авуниз лайих вацран къене дуьньяда авай вири мусурманри тIуьникайни хъуникай, сив чIурдай вири крарикай чеб хуьзвай ва идалди алемрин Халикьдин ﷻ вилик чпин муьтIуьгъвал къалуриз, Адан сергьят авачир регьимдик умуд кутуна, Адан эмирриз табий жезвай.
Гьар йисуз и вацра миллионралди мусурманри стхавилин араяр кIеви ийизва, кьетIен жумартвал, регьим къалурзава ва масадан дердиникай хабар кьазва, кесибриз ва муьгьтежбуруз куьмек гузва, ифтIарар тешкилзава. Гьа ифтIаррал сив хкуддай вахт алукьайла кIанзавай гьар са касдивай сив хкудиз жезва, гьакIни алимрин насигьатрин жуьреда руьгьдин тIуьнни къачуз жезва. Къуй Аллагьди ﷻ куь гьар са хъсан кар кьабулрай, квез куьтягь тежер няметар гурай.
Шадардай кар ам я хьи, ихьтин мярекатра миллетрилай ва динрилай аслу тушиз, шегьеррин, хуьрерин, карханайрин регьберрилай гатIумна ва жергедин инсанрилай хкечIна, жемятдин вири къатарин векилри иштиракзава. Абур вири сад-садаз менфятлу хьунин мурадди, Раббидин ﷻ регьимдин ва разивилин варз алукьунин гьакъиндай шадвал къалуруни сад ийизва. Ихьтин межлисар халкь сад хьунин, инсанрин арада стхавилин алакъаяр кIеви хьунин, гьакIни ватанпересвилин руьгьдик ва хайи уьлкве кIан хьуник чан кухтунин себеб жезва.
За Халикьдиз ﷻ чаз и бахтавар йикъара мад яшамиш жедай мумкинвал гунай кьадар авачир кьван шукур ийизва, къвезмай йисарани чун и регьимдикай магьрум тавун Адавай тIалабзава.
Къуй Аллагьди ﷻ чи вири гунагьрилай гъил къачурай, чи сивер, кпIар, закатар ва и вацра авур вири хъсан крар кьабулрай ва абурай шумудни са сеферда эвез хъувурай!
Къуй Рамазан вацран къене чна къазанмишай хъсан къилихрин ва крарин йуьк (багаж) гьамиша чахъ галаз амукьрай ва чавай къутармиш жез алакьай вири гунагь ва абурсуз крар са чIавузни элкъвена чал хтун тавурай!
И шукур авуниз лайихлу вацран гьуьрметдай за Къудратлу Раббидивай чун бедбахтвилерикай ва бахтсузвилерикай, фитнейрикай ва дявейрикай хуьн, исятда ислягьвал, хъсанвал ва адалатлувал патал женг чIугвазвай виридаз сабур, дурумлувал гун тIалабзава. Амин!»
Дагъустандин Муфтий, шейх Агьмад афанди
