Диде авачир уьмуьр

Ам гьихьтинди я? Дидедин кьиникьихъ гьазур хьун патал заз пуд варз авай. Гатфарин рагъ авай йикъарикай са юкъуз заз адан анализрин нетижаяр чир хьайила – зун патал дуьнья чкIана. Духтурди са затIни чуьнуьхнач. 15 йис хьанвай заз ада ачухдиз лагьана: «Чан руш, са затIуникайни хийир амач, мукьвара ам квевай къакъатда».

Дидеди вад йисуз азардихъ галаз женг чIугуна. Куьтягь тежедай химиотерапиядин курсар, капельницаяр ва маса дарманар – адаз анжах пис жезвай, амма уьмуьр са тIимил яргъалди физвай.

2007-йисан 15-августдиз чилел заз виридалайни багъри кас амукьнач.

Ам рекьидайла чIехи дидеди заз, вахаз ва стхадиз чи дидедин патав эверна. Адан гъил кьуна, чун ам и дуьньядай гьикI физватIа килигзавай. Элкъвена хквен тийиз. Гьамишалугъ. Чи ва дидедин бахтлу уьмуьрдин вахтар рикIел хквезвай. Хизанда зун гъвечIиди тир, зун кстахдаказ хвейиди туш, чун кесибдиз яшамиш жезвай. Амма авай затIар заз бес жезвай. Заз диде авай хьи, азизди ва виридалайни кIаниди…

Гьар пакамаз заз темен гана ахварай авудзавай диде. Чун адахъ галаз мукьва тир, ада мектебдин ктабханада кIвалахзавай, чун санал тарсариз физвай, тарсарилай кьулухъ ада заз меслят къалурай ктабар за кIелзавай. Къецепатан уьлквейрин классика кIелиз зун вердишарайди гьам я. Амма бахтлу вахтар яргъалди фенач. Ам кIевиз акъвазнавайтIани, начагъвили адан вири къуватар ва яратмишунин мурадар къахчузвай.

Пуд йисалай дидедин гуьгъуьналлаз бубани эхиратдиз фена. Ингье, заз акI жедай хьи, сагъ са дуьньяда зун сад я амайди. Уьмуьр вичин нубатдалди физва хьи. Амма за зи дидени буба рикIел хкун тавур са югъни авачир.

Гъуьлуьз фейи сифте вахтунда гъуьлуьн дидедиз завай диде лугьуз жезвачир, амма вахтар фейила заз ам кIан жез чир хьана. Бес ам – ДИДЕ я эхир. Зи дидедал чан аламаз зун пул къазанмишиз, адаз савкьватар гуз, лазим шейэр къачуз ва сиягьатриз ракъуриз агакьнач. Амма абур за зи кьвед лагьай дидедиз ийиз алахъзава.

Гьар са диде виридалайни хъсан затIариз лайихлу я хьи. Гьахьняй жуван дустариз ва мукьвабуруз за гьамиша чпин дидейриз гзаф фикир гун, абурун къайгъу чIугун ва пашманар тийиз алахъун меслят къалурзава. Чна гьамиша чаз вахт тахьун, кIвалах, дердияр багьна кьазва. Амма чун агакь тавун мумкин я. Чаз абур гьикьван гзаф кIанзаватIа лугьуз агакь тавун мумкин я. Дидейрин кIанивилелай михьи ва темягьсуз са затIни авач. Абурал чан аламай кьван – абурун къадир хьухь.

ЗУМРУД ГАМИДОВА