Гьар гюн 10 000 абат алса, къаркъарагъа не болар?
Гьар гюн 10 000 абат алса, къаркъарагъа не болар?
Гьар гюн он минг абат алып юрюме тарыкъны гьакъында ким де эшитгендир. Шо гертиден де пайда береми-бермейми деп билмеге къарайыкъ.
Гьакъ кюйде, эсгерилген санав кёкден алынмагъан, шо мекенли далиллеге асаслангъан. Японияда этилген ахтарывлагъа гёре, инсанны оьмюр болжалы ол гюнде нече абат этегенинден гьасил. Чалт кюйдеги юрюв юрекге ва къан тамурлагъа лап пайдалы таъсир эте деп санала. Гьар гюн юрюмек юрек ва къан тамур булан байлавлу аврувлардан аврумакъны эки керенге аз эте. Сыйракъгъа (голень) гюч этив – варикоз аврувну алдын ала. Юрюйген заманда къаркъарадагъы 200 жымчыкъ эт (мускул) ишлене. Къаркъараны бу кюйде ишлетив адамны авурлугъун артмагъа къоймай, азмагъа сюеген тиштайпалар учун шо бек агьамиятлы. Гьар гюн юрюмеге чыгъагъанда, биз сюеклерибизни къатты этебиз, неге десе къаркъара ишлетив кальцийни къолай къабул этдире, сюек къалын бола. Чалт кюйде он минг абат алагъанда, гьалыбыз къолайлаша, неге тюгюл юрюйген заманда къаркъара кортизолну ва адреналинни бек харжлай. Бу гормонлар гьалеклик тувгъанда арагъа чыгъа. Шону булан бирче къаныбызгъа дофамин кёп гелеген бола. Бу гормон къаркъара ишлейгенде арагъа чыгъа ва инсанны мурадына етишмек учун жаваплы деп санала.
Тёбен даражада къаркъара ишлетив клеткаларыбызны кислороддан тойдурта, иммунитетни беклешдирте.
Яяв аякъдан гезев къаркъарагъа инг пайдалы болмакъ учун, ашап битип ярым сагьатдан сонг юрюмеге яхшы. Шолайлыкъ булан, къандагъы шекер аз бола, айланыш гьаракат энергиягъа айлана.
Гьасили, биз англагъан кюйде, гьар гюнлюк юрюш сав къаркъарагъа пайда гелтире. Шулай гьаракат булан къаркъара авурлукъну кемитмеге боламы? Санап къарайыкъ: орта гьисапда, 100 абат алмакъ булан 4 калорий харжлана. Он минг абат алынса, 400 калорий харжлана. Мунда гьар гюн ашалагъан аш ва инсан нечакъыгъа азмагъа сюегени гьисапгъа алына. Адамны авурлугъу гьатдан озгъан буса, гёрмекли натижагъа етишмек учун, къолай кюйде тер тёкмеге тарыкъ болажакъ. Гьар гюн он минг абат алып юрюсек, савлугъубуз къатты болажакъ, гёнгюбюз ачылажакъ ва къаркъараны гьалы къолайлашажакъ.
