Патишагь ва вазир

Левли уили сай ца патишагь. Илис къуллукъличив уили сай пасихIкар вазир. Гьачам патишагьла бегIлара дигуси урчи беткахъили саби. Ил дебали гIяхIси жинсла урчи сабри ва патишагь дебали хумариуб. Вазир илизи викIар: «Пашманмайруд, дила патишагь, гьарил бетаруси секIал, гIяхIдешлис бетарусину».

Патишагь кьабулхIейкиб: «Сен гIяхIдешлис бируси, дилакIун урчи беткахъили саби?!»

Камси замана бикили гIергъи, илдачи хабар баахъиб, урчи баргили саби или. Ил дугIдерхурти сунела жинсла урчала илхъиличил цахIнабикили буили саби. Патишагьла къаравашунани иличил лебил илхъира барх киб.

Патишагь разивиуб ва вазир вархьли виъниличила буриб.

Гьачам патишагь сунела къуллукъчибачил варх гIяяр дуравхъун. ГIяярличиб илдани дугIла мицIираг дуцес кьадихьибти тIимкь ахтардидирухIели, хабарагарли патишагьла тIул ургабуциб, ва ил чеббикиб. ИлхIели патишагь дебали вайси хIяйчи викиб. Вазирли ил ряхIятвирулри: «ШишиммайкIуд, дила патишагь, гьарил кабиркуси анцIбукь гIяхIдешлис бетарусину».

ГIясивиубли патишагь вявухъун: «Беткахъибси урчи чарбухъун, амма агарси тIул кьалли чарбарес хIейрар! Секьяйда ил гIяхIдешли биэс бируси?!» ва вазир туснакъвариб.

ГIяхIцад замана дикили гIергъи, патишагь сунела гIяскарличил архIяличи дуравхъун. Амма зумаси вацIализи баибхIели, илдачи адамти буганти чебухъун ва лебилра ясирбуциб. Бареси кавлули ахIенри, лебилра илди бергес хIядурбарилри. Патишагьличи ярга баибхIели, ил ахтардивариб ва ца тIул агарли биъни чебаили ил ватур. Илдала пикри хIясибли, кьаркьайзиб нукьсандеш лебси адам вергалли, сабира илдигъунтили бетарниличи бирхулри. Илдани патишагь ваткаиб.

Патишагь сунела кIялгIялизи чарухъун ва вазир сунечи кахъес буйрухъбариб. ПасихIкар вазир кибхIели, патишагьли илизибад чевверхни тиладибариб ва гIур иличил жалхIерхъниличила багьахъур.

Вазир викIар: «Дила хIечи сегъуналра гьими агара. Ну туснакъварнира гIяхIсили уббухъун, сенкIун нура хIушачил варх виасри, гьанна хIечил варх хIейраси. Гьарил бетаруси секIал, гIяхIдешлис саби бетарусину».