«ЗЕБРА» КЕКСЫ

«ЗЕБРА» КЕКСЫ

Сәләм, дуҫтар! Һеҙҙең иғтибарығыҙға анһат ҡына бешерелгән «ЗЕБРА» кексын тәҡдим итәм. Уны өс вариантта: һөт, кефир йәки ҡаймаҡ менән бешерергә мөмкин. Һәр ҡайһыһы ла уңышлы килеп сыға, тикшереп ҡараным.

• 3 йомортҡа
• 1 стакан шәкәр
• 1 стакан һөт (йәки 1 стакан кефир, йәки 1 стакан ҡаймаҡ (20%))
• 0,5 стакан көнбағыш майы
• 1 балғалаҡ ҡамыр йомшартҡыс (йәки аш содаһы+уксус)
• 1,5-2 стакан он
• 2-3 аш ҡалағы какао

*1 стакан − 200 г

✔бөтә ингредиенттар ҙа бүлмә температураһында булырға тейеш

Әҙерләү барышы:

1. Йомортҡаларҙы шәкәр менән туғырға.
2. Һөт+көнбағыш майы (йә кефир + май, йә ҡаймаҡ) өҫтәп, яҡшылап болғатырға.
3. Ҡамыр йомшартҡыс менән ондо иләк аша үткәреп, ҡуйырғансы болғатырға (аш содаһын һалһағыҙ, һеркә менән һүндерергә)
4. Ҡамырҙы ике өлөшкә бүлеп, береһенә какао өҫтәп болғатырға.
5. Табаның уртаһына икешәр аш ҡалаҡлап ҡамыр ҡоя барабыҙ: тәүҙә ағын, аҙаҡ какаолыһын.
6. Ҡойоп бөткәс, ҡамырҙың өҫтөндә шырпы ярҙамында сәскә һүрәте эшләргә.
7. 180 градуста 25-30 минут бешерергә.