Табасаран ва Хив районариъ серенжемар

Къужник гъулаъ цIийи мист

25-пи мартди Табасаран райондин Къужник гъулаъ цIийи мист ачмиш гъапIну. Мист ачмиш апIуз гъуландарси жюрбежюр йишвариан хяларра уч гъахьнийи.

Гьарсари чан улхбаъ мист тикмиш гъапIдариз чухсагъул къайд гъапIну. ДумутIанна гъайри, му мажлиснаъ мистар тикмиш апIувалин заан дережайикан, айи савабнакан яркьуди ктибтну. Мистар тикмиш апIувал лап заан дережайин саваб тувру ляхнарикан ву. Гъит Аллагьу Тааьлайи му мистаз дакьатариинди, гафниинди ва жара жюрейиинди кюмек туву агьлариз савабар туври. Гъит Аллагьу Тааьлайи варидарин гунгьарин аьфв дапIну, сагъсаламатди му мистаъ ибадат апIуз тавфикьвал туври.

Гисик гъулаъ цIийи мист

12-пи апрели Табасаран райондин Гисик гъулаъ цIийи мист ачмиш гъапIну. Мист ачмиш апIбан серенжемдиъ Муфтиятдин фетвйир адагъру отделин руководитель Мугьяммад-Рамазан Раджабов, ислам илмарин доктор, Акъа гъулан имам Рашид Аьлимурадов, райндин главайин диндин ляхнарин кюмекчи Надир Зульфикьаров ва гьацира райондин имбу имамар, аьлимар иштирак гъахьну. Мажлис кIули гъабхурайир Табасаран райондин имамарин Советдин председатель Ансар Рамазанов вуйи. Мист ачмиш апIури Гисик гъулан имам Мирза Шябановди вари дуфнайи хялариз, имамариз чухсагъул гъапну. ДумутIанна гъайри, дугъу му мист тикмиш апIруган иштирак гъахьидариз, спонсорариз кIваантIан чухсагъул гъапIну. «Гьюрматлу жямаьтар, дуфнайи хялар! Ихь жямаьтди гьамциб бицIи вахтна мициб мист тикмиш апIбан аьхю вуйи чухсагъул, гъит Аллагьу Тааьла ухькан варидикан рази ишри», - гъапну Мирза Шябановди.

Му мажлиснаъ ихь диндихъди аьлакьалу гизаф ляхнарикан гъулхну, хусуси вуди: дишагьлийири палат алабхьбакан, инсан фаркьат апIругандин фарзар, суннатарикан, Рамазандин вазлиъ ушвар дисбакан, гъудган апIуваликан ва гь. ж. Мажлис дюаь апIбиинди ккудубкIну. Ихь терефнаанра му мистахъ зегьмет гъизигдариз чухсагъул кIурахьа ва гъит Аллагьу Тааьлайи женнетдиъ хал тикмиш апIри гьаруриз.

Маджлис-зиярат Гурихъ гъулаъ

8-пи апрелиъ Табасаран райондин Гурихъ гъулаъ адлу шейх Зияуддин Юсуф-гьяжи Курихийиз гюрюш вуйи зиярат-маджлиз кIули гъубшну. Му серенжемдиз жюрбежюр йишвариан инсанар уч духьнайи. Сабпи нубатнаан, вари уч духьнайидар накьварихъна душну, гирами Каламдиан «Ясин» сура дурхну, бахш гъапIну. Накьварихъ Гурихъ гъулан имам Гьяжисефер халуйи уч духьнайидариз жикъиди шейхдикан мялумат тувну. Хъа накьварин гъвалахъ ккабалгнайи гюргеч багъдиъ му шейхдиз гюре вуйи мажлис ккебгъну.

Мажлиснаъ Гурихъ гъулан имам Гьяжисефер Алиханов, райондин имамарин Советдин председатель Ансар Рамазанов, Дербент шагьрин дяъват Отделин регьбер Ризван Гьябибов, Хазар гъулан имам Къурбан Рамазанов иштирак гъахьну. Шейхдин хтул Юсуфов Юсуфгьяжийи яркьуди уч духьнайидариз чпин аьхю абайин уьмрикан, тарихдикан ва дугъу гъабхури гъахьи ляхникан ктибтну. Гъулан имамди мициб серенжем тешкил апIбан ва мушваъ иштирак хьпан варидариз чухсагъул гъапну ва гьарйисан саб ражари гьамциб къайдайиинди зиярат апIидихьа кIури, ният гъапIну. Райондин имам Ансар Рамазановди шейхдин хутлар, мирасариз чпин абайин ччвур ккибсну мициб серенжем кIули гъабхуз кюмек тувбан чухсагъул гъапну.

ЧвулатI гъулаъ вечер нашидов гъабхьну

10-пи апрели Табасаран райондин ЧвулатI гъулаъ чпин гъулан тарихдиъ сабпи ражари вуди вечер нашидов гъабхьну. Серенжемдиъ райондин имам Ансар Рамазанов, гъулан глава Герейхан Мирзаханов, школайин директор Гюлаьли Жамалов, Муфтиятдин фетвйир адагъру отделин руководитель Мугьяммад-Рамазан Ражабов, Ислам илмарин доктор Рашид Аьлимурадов, Дербент райондин дяъват отделин регьбер Ризван Гьябибов иштирак гъахьну. Гъулан имам Аьгьмад Сеферовди вари жямяаьтариз, дуфнайи хялариз гьамци заан къайдайиинди му серенжемдиъ иштирак хьпан аьхю чухсагъул гъапну.

Райондин имам Ансар Рамазановди гъулан главайиз, школайин директориз ва гъулан имамдиз сатIиди гъабхурайи ляхнин чухсагъул кIури пешкешар тувну. Хъа гизаф йисари гъулан имамвал гъапIу Мягьяммадаьли Сулеймановдиз муфтиятдин терефнаан «чугъсагъулвалин» кагъаз тувну. Улхбарин арайиъ «Нашидуль Ислам» группайи мавлидар-нашидар гъурхну.