Мединайиз рякъюъ
Йикьрариъ а
Тухмар Сахиф
Ва Хавазин
Гьюжум апlуз
Мусурмнариз.
Ажугълу ву
Мекка шагьур
Гъадабгъиган.
Чпин кьушмарин
Аьхюр ктагъу
Малик кlурур.
Теклиф диву
Дугъу гьамциб:
«Эгер ухьу
Дяви ккебгъруш,
Дявдин чюлиъ
Гъузуз кьушмар
Хъади хизан
Душну ккунду,
Дарш аьгъяхьуз
Фици шулуш».
Ва дерейиъ
Автас кlуру,
Ярхла дарди
Хунайихьан,
Бина гъиву.
Ихь Пайгъамбри
(Салават ва
Салам дугъаз)
Амур дапlну,
Аьсгьябари
Гьязур апlуз
Хъюгъю кьушмар.
Ихь Пайгъамбри
(Салават ва
Салам дугъаз)
Гъаврикк ккау
Вари дестйир,
Гьар тухмихьна
Пайдагъ туву.
Хъасин дурар
Багахь гъахьи
Хунай кlуру
Дерейихьна.
Душмни сифте
Гьюжум гъапlу
Гъарзаригъян.
Чlимрар`инди
Сел уьлюбхю,
Хъасин дурар
Хабарсузди
Дижи гъахьи.
Хъа мусурмнар
Кьяляхъ шула,
Кьурайшитар
Кялхъюри а:
«Гьергра мурар
Уьру гьюлиз».
Тмунури кlур:
«Мягьяммаддин
Тlилисимдиъ
Кьувват имдар».
Ихь Пайгъамбри
(Салават ва
Салам дугъаз)
Кюмек тувуб
Ккун апlура
Аллагьдикан.
Кьабул гъапlу
Дюаь дугъан –
Гъюр кюмекназ
Малайикар.
Душман гьергуз
Хъюгъю дишла,
Автас кlуру
Бинайилан,
Дирчну девлет,
Чпин хизанар.
Йисирарди
Гъузна хайлин,
Ва дурариз
Теклиф диву
Ихь Пайгъамбри
(Салават ва
Салам дугъаз)
Ихь ислам дин
Кьабул апlуз.
Гьергу душмнар
Шубуб тереф:
Таифдизди,
Нахализди,
Автас кlуру
Дерейизди.
Хъа мусурмнар
Хъергну айи,
Душмнин кьушмар
Терг гъапlнийи.
Душмни гъитна
Девйир, гъизил,
Арсна девлет
Ва чарвйирин
Аьхю сюрйир.
Ихь Пайгъамбри
(Салават ва
Салам дугъаз)
Диву теклиф
Гъабхуз душмнин
Вари девлет
Меккайихьан
Ярхла дару
Джи`ран кlуру
Дерейизди.
Хайлин кьушмар –
Хавазинтар,
Сакифитар –
Жин шулайи
Таиф шагьриъ.
Шагьрин вуйи
Ягъли цалар.
Читин вуйи
Мусурмнариз
Гьюжмиинди
Шагьур бисуз.
Дапlну ашра
Хайлин аьмлар,
Гъабхьундайи
Шагьриъ учlвуз.
Гьамци гъушу
Хайлин йигъар,
Ихь Пайгъамбри
(Салават ва
Салам дугъаз)
Аллагьдикан
Ккун гъапlнийи
Амур апlуб
Инкар душмниз
Дяви дарди,
Дюз рякъюъди
Ислам диндиз
Чпи мютlюгъ хьуз.
Ансарари
Гъапlу гиран
Пайгъамбрикан
(Салават ва
Салам дугъаз),
Душмнин девлет
Тувган чпиз цlиб,
Хъа кьурайшит
Тухумдиан
Вуйидариз –
Чпизтlан артухъ.
Аьгъю дубхьну
Му ляхникан,
Кlуру дугъу:
– Хабар гъабхьниз
Учвуз гиран
Хьуваликан.
Сабур туври
Ухьуз вардиз.
Кьурайшитар
Иман зяиф
Вуйидар ву
Гьелелигки.
Ижми ибшри
Му ихь ислам,
Вари шула
Амриинди
Сар Аллагьдин.
Ихь Пайгъамбрин
(Салават ва
Салам дугъаз)
Рягьимлу ва
Гьякь гафари
Гизафдариз
Гъапlу эсер.
Гъавриъ ахъу,
Рази гъахьи.
Тухум Бану
Тайимдин ву
Икрам апlруб
Гъарзук кайи
Сурат аьхю.
Ихь Пайгъамбри
(Салават ва
Салам дугъаз)
Аьли гьау,
Хъади кьушум,
Дармадагъин
Апlуз думу.
Къаршу гъахьи
Му пис душман,
Амма Аьлди,
Гъалиб духьну,
Йисирарди
Хъади гъафну
Му тухумдин
Кlубан кьушум.
Думу тухмин
Аьхюрин риш
Сафанайи
Ккун гъапlнийи
Пайгъамбрикан
(Салават ва
Салам дугъаз)
Учв деетуб.
Мугъан тlалаб
Тамам гъапlу.
Хулаз хъуркьган,
Гъардаш Ади
Гьау дугъу
Пайгъамбрихьна
(Салават ва
Салам дугъаз).
Кьабул гъапlу
Дугъу ихь дин.
Гъяркъю мугъаз
Дишагьлийир
Хирайиан,
Гьич сарихьан
Дарди зат гучl,
Кябайилан
Илдицури.
Арайивдин
Кьурамитдин
Инсанари
Гизафдари,
Гъавриъ ахъну,
Кьабул гъапlу
Ихь ислам дин.
Византийин
Аьхюрариз
Гучl гъабхьнийи.
Йирхьудваржна
Сумчlурпи йис.
Ираклийи
Гьязур дапlна
Аьхю кьушум
Дяви ккебгъуз
Пайгъамбрихъди
(Салават ва
Салам дугъаз).
Хабар дебкку
Алверчйири
Ихь Пайгъамбриз
(Салават ва
Салам дугъаз).
Уч гъапlнийи
Чан аьсгьябар,
Гъапнийи му
Хабарнакан.
Ккун гъапlнийи
Варидикан
Кюмек апlуб.
Дупну ккунду,
Дугъриданна,
Мусурмнари,
Касиб, девлет
Айир вушра,
Кюмек гъапlу,
Аллагь рази
Ишри чпикан,
Гьякьлу вуйи
Лукlарикан.
Гьелбет, айи
Кьюб маш гъяйи
Агъдабнарра.
***
Ражабдин ваз.
Ихь Пайгъамбар
(Салават ва
Салам дугъаз)
Кьушмар хъади
Удучlвнийи
Мединай`ан.
Пайдагъ хьайи
Абубакрахь.
Аьли гъитна
Мекка шагьриъ
Кюмек апlуз
Хизанариз
Ихь Пайгъамбрин
(Салават ва
Салам дугъаз)
Гьарсаб тухмин
А чан пайдагъ,
Учlвна рякъюъ
Табукдизди.
