Москвада лезгийрин мавлид

Москвада лезгийрин мавлид

13-октябрдиз Москва шегьерда, «Азимут сити» лугьудай дараматда лезги халкьдин мавлид кьиле фена. Ам РД-дин Муфтиятдин векилри вичин ери-бине Стlал-Сулейманан райондай тир Гьажимирзоев Тlагьир галаз санал тешкилнавай.

Заур Салигьова Къуръандин аятар кlелуналди ачухай мярекат Ахцегь районда Дагъустандин Муфтиятдин диндиз эвер гунин хилен регьбер Ашуралиев Гьуснудина кьиле тухвана.

Межлисдал Дагъустандин Муфтийдин куьмекчи Мегьамедов Агьмад, Кьурагь райондин имам Бабаев Агьмад, Докъузпара райондин имам Шамилов Узаир, Мегьарамдхуьруьн райондин Ярагъ Къазмайрин имам Мегьамедов Агьмад, Стlал-Сулейманан райондин Агъа-Стlалрин имам Бейбалаев Тlалиб рахана. Абуру Мугьаммад Пайгъамбардал ﷺ гъизвай салаватрин сувабдикай, Пайгъамбарди ﷺ тунвай ирсдикай, Ислам диндиз табий хьунин важиблувиликай, Ватан кlан хьуниз Ислам динди гузвай къиметдикай, лезги халкь сад хьуникай насигьатар авуна.

Мярекатдал Дагъустандин Муфтиятдин патай Гьажимирзоев Тlагьираз чухсагъулдин чар гана ва ада вичин патай межлис тешкилиз куьмек гайибуруз виридаз чухсагъул лагьана.

Гьакlни межлисдал атанвайбурун арада «Марва» турди чара авунвай савкьватдин умра чип вегьена ва ам Бейбалаев Ринатаз акъатна.

Мярекатадал атанвай кьван аялриз савкьватар пайна.

Насигьатрин арайра Заур Салигьова мавлидар-нашидар кlелна.

Къуй Аллагьди ﷻ кьабулрай!