Жуван меслят жуваз тур!
Куьне фикир гайиди яни, маса инсандиз меслят гуз гьикьван регьят кар ятIа? Я тахьайтIа жуван фикир лугьуз, ада вуч авун ва я тавун лазим тиртIа, гьатта вавай хабар кьун тавунваз хьайитIани? Кар чарадан уьмуьрдиз талукь тирла, чакай на лугьуди психологар ва я арифдарар жезва ва вуч ийидатIа, дуьз чизва. Гьикьван гзаф вахтара чи кьилел атай гьахьтин дуьшуьшра чна абуруз ухшар авай меслятрал амал ийизвач!
Эгер накь за, дустуниз меслят гудайла, инсанрикай хъел къвемир ва Аллагьдик ﷻ умуд кутур лугьузвайтIа, пака лагьайтIа, гьисабзава хьи, са кас захъ галаз гьахъсуз тир лагьана, им зи патай дуьз жедани? Инсан вич-вичин вилик дуьз яни?
Вучиз маса инсандиз меслят гуз гьакьван регьят кар я? Вучиз чун бязи вахтара масадаз меслят гуз алахъзава, гьатта чавай ам тIалаб тийиз хьайитIани? Вири регьят я: инсандиз неинки бедендин игьтияжар, гьакI ментальный игьтияжарни ава. Абурукай сад – жуван важиблувал ва жув кар чидайди яз гьиссун я; ам жуьреба-жуьре себебралди арадал къвезва, месела жувавай са гьихьтин ятIани кар кьиле тухуз тахьайла. Масадаз меслят гудайла, инсанди вичиз чирвал ва тежриба авайди тестикьарзава ва гьа идалди вичи-вич тестикьарзава. Амма а гьалдиз вич аватайтIа, ада вичи меслят къалурзавайвал вич бажагьат тухуда.
Лап гзаф вахтара, са касдин рикIиз теселли гудайла, чна вири Аллагьдин ﷻ кьадардалди жезвайди адан рикIел хкиз алахъзава, амма жуван рикI секинариз алахъдайла, чи рикIелай а кар алатзава. Я им чна гузвай меслят рикIин михьивилелди тагун я, я адал амал ийиз алакь тавун. Масадаз насигьат ва я меслят гудалди, жуван ниятдикай фикир авуртIа хъсан я. Вичи лагьайвал тийизвай касдин меслятдиз инсанри яб гузвайди туш. Имам аль-Гъазалиди «Бидаят аль-Гьидаят» ктабда кхьизва хьи, инсандин къилихди гафарилай крариз табий жез майилвал ийизва.
Ингье жув четин гьалдиз аватайла жуваз гьикI теселли гудатIа, меслят арадал атана. Виридалайни хъсан кар жеда жувавай хабар кьуртIа: эгер и гьал масадаз талукь тиртIа, за гьихьтин меслят гудай? Им уьмуьрдин четинвилер алуддай ахтармишнавай къайдайрикай сад я.
Къуй Аллагьди ﷻ чаз, чун гьихьтин гьалдиз аватайтIани, дуьз къарар кьабулдай сабур ва акьул гурай. Амин.
