ДакIнил инт

Му иш дакIнин тIааьн къабивзсса цавагу бусурманчу къаливчIунни. Амма яла аьжаивмур бур ми ччучлачиминнахун цучIав ахкъачин полициялул ябуллай бия, тамансса журналисталгу хIадур бувну бия.

Европанал хIукуматирттай Исламрал чулухуннай мукунсса провокациярду цалчин дакъар дуллалисса.

Швециянал хIукуматрал бакIчитурал баян бувну бур Кьуръан ччуччаву – демократияну ккалли дуллалишиву. Пикри барча, тайннал демократиягу, тархъаншивугу щаллу хъанай дур 1,5 миллиардрайн бивсса бусурманнал мубаракса Лу ччуччин ихтияр дулаврийну ва ччучлачиминнацIун кабакьаврийну.

Аммарив, Исламрал душмантурал циксса Кьуръандалул луттирду ччуччирчагу, ганиву чивчусса Аллагьнал каламран муния цукунчIавсса зарал къахьунтIиссар. Мяйжанссар, бюхъайссар тайннаща луттирду ччуччин хьун, амма цуппа Луттирал уссар га буруччин махъ буллусса Заллу – Аллагь.

Кьуръандалуву «аль-ХIижр» тIисса суралул 9-мур аятраву чивчуну бур (мяъна): «На зучIан насихIатран Кьуръан гьан бав, На му буруччинна». Мунин бувну, жула душмантурал цуксса хIарачат булларчагу, бусурманнал дакIурдива Аллагьнал Калам лиххан буван тайннаща цукунчIав къахьунтIиссар. Жунмарив аьркинни хъиннува ялув бавцIуну Кьуръандалул ва МухIаммад Идавсил ﷺ ккаккан бувсса ххуллу бувгьуну бачин, ккалан, лахьлан.

«Ар-Раъд» суралул 11-мур аятраву увкуну бур (мяъна): «Халкьуннавусса тагьар Аллагьнал даххана къадувантIиссар, гай цивппа баххана хьун хIарачат буллай бакъахьурча. Аллагьнан ﷻ ччан бикIарча халкьуннайн оьбала тIайла буккан, гай щилчIав ххассал къабувантIиссар, Аллагь акъа цама заллу гайннал акъассар». Кьуръандалуву укунсса мяъна дусса цаймигу аятру бур. Вайннува бувчIлай бур дакIниву иман дусса инсан цала цува ххуймур чулинай аххана уван хIарачат буллан аьркиншиву, Заннал ялув бивхьумунил хIакъираву баччибакъашиву дуллангу къабучIишиву.

Аммарив жунма къабучIиссар Кьуръан ччуччаву куннасса провокациярдах хъиннура къулагас дуллай, гьалак буклай, пикри бакъасса тIуллу дуллан. Му бакъарив тайннал мурадвагу.

Жунма лайкьссар Кьуръандалул насихIатирттах хъиннура къулагъас дурну, жула оьрмулул гьануну ми бугьан, жула дакIурдил интну хьун буван.

Жунма дакIний бур цаппара шиннардил хьхьичI тава Европанаву МухIаммад Идавсил ﷺ карикатурарду кказитрай рирщусса куц. Га чIумал чIявусса инсантал байбивхьуна Идавсил ﷺ оьрмулия кIул буллай, ганал тарих лахьлай. Бачияра цIанагу Кьуръан лахьхьаврихсса къулагъас гьарза даннуча! Заннал кумаг баннав!

МухIаммад АхIмадов