Рамазан зурул даража
ЖучIанма мубараксса Рамазан барз гъан хъанай бур. Ва зурул хьхьичIра-хьхьичIсса хьхьу дуркIукун, Алжаннул хьулурду тIивтIуну, му барз гьаннин къалакьайссар. Дуржагьрал хьулурду лавкьуну, му барз гьаннин къатIитIайссар. ЩяйтIантал байщун бувайссар, иблислуй къатIа бишайссар. ЛивтIумий ххари шайссар, уттавамий рахIат шайссар. Оьшивуртту къачичайссар, хъиншивуртту ацIлийну чичайссар, бувцири бунагьирттал аьпа бувайссар, аьзаврая ххассал бувайссар.
Рамазан – хъинну барачатсса барзри. Муниву бувсса ца фаризалул чири, цамур зуруй бувсса арулцIалуннилуксса буссар. Мунивусса фазиларду чIяруссар, хъиншивуртту, хъуншивуртту чIяруссар, цайми зурдардивунияр гьарзассар. Му зуруй дурсса дуаьлухьхьун Аллагь Тааьланал жаваб дулайссар, цадакьа кьамул байссар, тIааьтру ххирассар, эбадат кьамулссар, ливтIумий неъматравуссар. ХIатта, мунивусса гьарца ссятраву цIаран хIакь хьусса ряхттуршазара инсан тархъан итайссар. Щалва зуруй тархъан бивтссаксса ца Лайлатул-Кьадрилул хьхьунугу тархъан битайссар. Мий цинявппаксса ца Зума ритавал байрандалул кьинигу тархъан битайссар. Зурул махъра-махъсса хьхьуну ссаврду, лухччив, малаиктал аьтIун бикIайссар, ххирасса умматиннан мюнпат бусса барз лагаврий. Мунил дайдихьу – цIимири, дянивалу – бунагьирттал аьпа бавури, ахир – цIарая тархъан битавури. ХIасил, му Рамазан барз шинал дакIри, му саламат бувну, мунил хIурматгу бурувччуну, Аллагь ﷻ кIицI лагавугу, тIааьт-эбадатгу чIярусса дурну, жамааьт-чаклийгу ялув авцIуну, Кьуръангу чIявуну буклай, мизитраву иътикаф чIяруну дурну, хIарамсса, оьккисса задругу къабувну бусурманнан кумаг буллай, дуаьрдугу чIярусса дурну, цадакьарттугу чIявусса бувну, ххуйну тIайла буккарча, щалла шингу саламат шайссар, зарал къабивну личIайссар, му шинаву бувцири бунагьру багъишла битайссар.
Кьиямасса Кьини му барз ххуйсса суратрай бувкIун, Аллагьнал ﷻ хьхьичI суждалийн багьну, Аллагьнахь ﷻ чIа учинтIиссар цилва хIурмат бурувччумий. Аллагьналгу ﷻ: «Буца вилва хIакь бурувччумий», – учинтIиссар. Яла мунил му Рамазан зуруй зума дугьлай, мунил хIурмат буручлай бивкIми ка дургьуну, Аллагьнал ﷻ хьихьичIун бувцуну, гайннай хъуншиврул таж биша куну Аллагьнахь ﷻ чIа куну, бишин бувантIиссар.
Аллагь Тааьланал ца малаик ляхъан увну уссар мукьра лажин дусса, ца лажиндарая ца лажиндарайн бияннин мукьазарда шинал ххуллу бусса. Мунал ца лажин Аллагьнайн ﷻ суждалийн дагьна дуссар, ца лажин – Аьрщу-р-рахIманнайн дурургун дуаь дуллай дуссар, Рамазан зуруй зума дугьлай бивкIсса МухIаммад идавсил ﷺ умматиннал бунагьирттал аьпа бува, рахIму бува тIий. Цагу – Алжаннавун дурургун дуссар, мивун увхманансса хъинбала чIа тIий. Цагу – Дуржагьравун дурургун дуссар, гивун увхманан аьзав, оьбала чIа тIий.
ХIасил, рамазан зурувусса хъинбаларттугу, барачатшивугу кIулссания халкьуннан, щаллара шин му барзну дусса хьурдай тIунссия.
