Жагьил болмакъны сырлары
Жагьил болмакъны сырлары
Къатынгишилени арасында гённю къарт болмай сакъламакъ учун тейпирование деп айтылагъан къайда генг яйылгъан. Пластырьни кёмеги булан этилеген бу ишни уьйде де этмеге бажарыла. Сыпатгъа багъыйлыкъ береген, бюрюшмелени тайдырагъан ёравланы бугюн аян этейик.
Тейп деген недир ва не учун тарыкъ
Тейп – пластырьге ошайгъан хас къумачдан этилген лент. Тейп гёнге бир ёрукъгъа гёре ябушдурула ва шолайлыкъ булан гённю салланмагъа къоймай жыя. Шону яхшылыгъындан бетни мышцалары бошала, къан чалт ишлеп йибере ва натижада жагьилликни къайтара. Бу ишни гьар заман этип турса, гьатта теренлешген бюрюшмелер де язылып, тегиш бола.
Тейпни нечик сайлап айыра?
Тейпни аптекден яда хас тюкенлерден сатып алмагъа бола, учузларын алмаса яхшы. Къолламакъ учун лап онгайлылары – генглиги 5 сантиметр гелегенлери.
Не заман къоллана?
Пластырь булан бетни безендирив 25 йыллыкъ чагъындан башламагъа ярай. Шону къолламагъа башлагъан сонг, юзюндеги увакъ бюрюшмелени сыйпап тайдыргъандай ёкъ болгъанда ажайып къалажакъсыз. Уллу чагъындагъы тиштайпалагъа мурадына етишмек учун бираз артыкъ заман тарыкъ. Тейпни пайдасын эки жумалардан гёрмеге бола. Бу ишге сувландырагъан крем, бетге массаж, тарыкъ чакъы сув ичив ва толу юхуну къошса, аривлюк учун багьалы салонлагъа бармаса да ярай. Тейп жагьиллик ва гёзеллик берип, шонча да таъсир эте. Тейпни бетге бир сагьатдан сегиз сагьат болгъанча сала – юхлайгъан вакътиге къойма да ярай.
Тейпни ябушдурагъан кюй
Тейпни къоллайгъан хыйлы тюрлю кюйлер бар, шолагъа интернетден таба уьйренмеге къыйын тюгюл. Аслусу – тейп ябушдурагъан ерде гённю тегиш этмеге тарыкъ, дагъы ёгъесе бюрюшген кюйде къалажакъ.
