Рагьатлыкъ гелтиреген чайлар
Рагьатлыкъ гелтиреген чайлар
Ойланы пашманлыкъ къуршайгъанда, къаркъараны гьалеклик бийлейгенде яда гечелер юхлама болмайгъанда, гьалны енгил этмеге татли чай кёмек этер. Бу ажайып ички нерва системагъа яхшы таъсир эте. Гьайрангъы чайдан эсе, отлардан этилген рагьатлыкъ береген чай къолай. Ромашкадан, нанадан (мята), ёгеден (липовый) – гьар ким ушатагъанындан чай къайнатма бола.
Ромашка чай
Ромашкадан къайнагъан чай умуми къаркъарагъа пайда бере. Бу чай гьалекликни басылта, къатты юхламагъа кёмек эте. 200 мл сувгъа 1–2 гиччи къашыкъ ромашка гюллер тарыкъ. Къайнар сувгъа ромашканы къошуп, 10 минут тонгмагъа къоя.
Ёге чай
Ёге чайны татуву арив бола ва бал ийисге ошай. Кёплер билеген кюйде, о чай иссиликни басылта. Ондан къайры, бу чай бютюн нерва системагъа да яхшы таъсир эте. 4 гиччи къашыкъ ёгени чечеклерин 200 мл къайнар сувгъа тёгюп, 15 минут тонгмагъа къоя.
Шалфей булангъы чай
Шалфей – арив ийисли ва бек пайдалы оьсюмлюк. Шондан этилген чай хыйлы аврувлагъа эм санала. 2 гиччи къашыкъ шалфей япыракълагъа 200 мл къайнар сув тёге. Бу чай нерва системагъа яхшы таъсир эте ва тиштайпаны савлугъу учун да пайдалы. Амма бу чайны къатынгиши авур заманда ва яш ичирегенде ичмеге ярамай.
Нана булангъы чай
Нана булангъы чай рагьатлыкъ ва ял алмакъ учун арив къыйыша. Нана къарсалавдан, гьалекли гьалдан къутулмакъ учун, кёмек этегени алдан берли белгили. Бу чайны ярашдырмакъ учун, нананы яшыл япыракъларын тююп (1 уллу къашыкъ), бир стакан къайнар сувгъа къоша. Сонг 5 минут тонгмагъа къоя, сюзгючден чыгъаргъан сонг, чай ичилмеге гьазир. Олай да, бу чайны нананы къуругъан япыракъларындан да биширмеге бола. Шону учун нананы къуругъан япыракъларын тенг оьлчевде оьзге чайгъа къошса таман.
