Нерваланы …гюллер булан къолай этебиз
Бавчулукъ (садоводство) – юрек ушатагъан иш де дюр, шону булан бирче психика гьалыбызгъа арив таъсир де эте, айрокъда, бизге, къатынгишилеге. Ахтарывлар гёрсетеген кюйде, бавда ишлемек, оьсюмлюклеге къарамакъ къаркарагъа пайдалы йимик гьалекликни де басылта экен.
Алимлер токъташдыргъаны йимик, бавчулукъ гьатта дарманлардан да пайдалы болма бола. Бавда он минут ишлеген булан адамны баш майын рагьат этмеге ва гёнгюн гётермеге бола. Булайлыкъ насипни гормонлары – эндорфин ва дофамин булан байлавлу. Шоланы кёмеги булан инсанны къаркъарасындагъы гьалеклик тая ва умуми гьал къолайлаша.
Агьлюдеги къалмагъал, эришивлюклер булан кёп къаршы болагъан, иши авур ва оьзге себеплеге гёре ачувлу тиштайпалар учун бавчулукъ айрокъда пайдалы. Терек орнатыв, гюл чачыв, яшылча ва оьзге оьсюмлюклер оьсдюрюв гьар гюнлюк масъалалардан баш къачырма, рагьатлыкъ тапмагъа болушлукъ эте.
Ондан къайры, бавчулукъ къаркъараны умуми гьалына да арив таъсир эте. Бавда ишлемек учун жагьлыкъ ва гюч тарыкъ. Ишлейген адамгъа къарыв къошула деп санала. Уьстевюне, таза гьавада ишлемек юху учун да пайдалы ва инсангъа жагьлыкъ да къоша.
Ишлемек учун уллу бав яда гёрмекли топуракъ гесек тарыкъ да тюгюл – гьатта уьйню ичинде, терезебашда яда балконда гиччирек «бав» этме де бола. Бир-эки оьсюмлюк де уллу пайда гелтире. Аслусу – бу гьаракатгъа жумада эки-уьч сагьат багъышлама тарыкъ.
Бавчулукъну кёмеги булан агьлюнг яда къурдашларынг булан кёп арив заман йибермеге де бола. Бавда бирче ишлемек булан аралыкълар беклеше, арадагъы татывлукъ да арта.
Шолайлыкъ булан, бавчулукъ къайгъыны басылтмагъа кёмек эте, адамны гёнгюн ача ва яшавлукъ гючню артдыра.
