Яшланы уьюн онгарабыз: гиччипавланы турагъан ери онгайлы болма герек

Яшланы уьюн нечик онгарма бола? Бизин кёплерибиз, аналар ва улланалар, шону оьзлер ушатагъан кюйде эте, гьатта бир-бирде башын авуртдурма да сюймей: аслусу – ятагъан ер, шанжал булан стол, оюнчакълар ва низам болмакъ. Амма касбучулар яшланы уьюн онгарывгъа яхшы агьамият бермеге герек деп ойлаша ва бу ишде гиччипавну онгайлыгъын гьисапгъа алма тарыкъ.

Яшланы уью – янгыз юхламакъ ва ойнамакъ учунгъу ер тюгюл, бу бир уллу дюнья, шону ичинде яш оьсе ва торая. Муна шо саялы шону ичин онгайлы ва яшама арив этип кюйлеме герек. Энни гиччибиз ушатар кюйде ону уьюн онгарабыз.

Тюс сайлайбыз

Яшланы уьюн онгарывда тюс агьамиятлы ер тута. Неге десе тюс яшны кепине ва ругь гьалына тувра таъсир эте. Яшланы уьюн онгарагъанда шу ишлеге агьамият беребиз:

Яшны чагъы. Гиччипавлар учун ачыкъ ва йымышакъ тюслер тангламакъ яхшы, олар гёзге илинмес. Оьрюм яшлар буса, ярыкъ ва авур тюслени ушатма бола.
Яшны хасияты ва сюеген ишлери. Эгер яш табиатны сюе буса, яшыл ва гёк тюслени танглама ярай. Космосну сюегенлер учун гёк ва гюмюш (боз, кюлтюс) тюслер къыйышар.
Ярыкълар. Ачыкъ тюслер уьйню генг ва эркин эте, авур тюслер (гьатдан озмай буса) – жыймакълы ва исси эте. Амма бек ярыкъ ва авур тюслер бир-бирде жагьлыкъ тувдуруп, яшны гьалекли этме болагъанны билме герек. Шо саялы гьатдан озмайгъан орта даражалы тюслер сайласа яхшы.

Мебель

Яшланы уьюндеги мебель арив гёрюнюшлю болмакъдан къайры, къуллукъ этеген де болма тарыкъ. Мебель сайлайгъанда шуланы гьисапгъа алма тийишли:

Уьйню оьлчевю. Мебель уьйню оьлчевюне гёре болма тарыкъ, уьй бош болуп гёрюнме герекмей.
Яшны уллулугъу. Гиччипавлар учун мебель къоркъунчсуз ва онгайлы болма тарыкъ. Ону хырлары итти тюгюл, дёгерек болма тийишли. Оьрюм яшлар учун уллулагъа йимик мебель де къыйыша – масала, языв учунгъу стол ва шанжал.
Бала сюегени гьисапгъа алына. Эгер яшны кёп сюеген оюнчакълары бар ва ол нени буса да жыя буса (хобби), мебелни шо ишлеге къыйышывлусун алмагъа арив болар. Масала, китаплар яда жыйылгъан оюнчакълар учун тахча болмакъ яхшыдыр.

Дурус ясалгъан матрас булангъы краватны да унутмайбыз. Дурус тёшек яшны арив юхусуна болушлукъ этежек. Оюнчакълар, опуракъ ва оьзге затлар учун ер белгилеме де тарыкъ. Шо – шкаф, комод яда тахча болма бола.

Ярыкъны масъаласы

Ярыкъны дурус кюйлемек – яшны уьюн онгайлы этмеге агьамиятлы абат. Ярыкъ сайлайгъанда шу ишлени гёз алгъа тутабыз:

Табии (естественный) ярыкъ. Эгер уьйде табии ярыкъ кёп буса, шолайлыкъ уьйню эркин ва уллу этип гёрсете. Амма гюнешни шавлаларын унутма ярамай, олар бек ярыкъ ва гючлю ура буса, адамгъа пуршав этмеге бола.
Табии тюгюл (искусственный) ярыкъ. Ярыкъ гелеген аслу ерден къайры (масала, люстра) уьйню ичинде ярыкъ береген оьзге ерлер де болса яхшы: стол лампа яда гече янагъан чыракъ. Булар къарангы вакътиде аз ярыкъ берип, арив къуллукъ эте.
Ярыкъны кюйлев. Ярыкъны гючлюгюн кюйлеме болагъанлыкъ гюндюз яда къарангы вакътиге гёре шону къыйышывлу этмеге бола.

Уьйню тизилиши

Уьйню тизилишинден кёп зат гьасил: арив тизилгенде яшама да онгайлы, ичинде турма да сюесен. Уьйню тизегенде шуланы эсде сакъласа яхшы:

Яш ушатагъанны гьисапгъа алыв. Яш кёп сюеген игитлени суратлары, ону кепине гелеген гёрюнюшлер, масала, космос гемелер яда табиат булангъы суратлар уьйню ичин жанландыражакъ, арив этежек.
Тюслени къыйышдырыв. Уьйню ичиндеги тюслер бир-бирине къыйышывлу болагъан кюйде ясалмагъа яхшы.
Къоллама онгайлыкъ. Уьйню ичиндеги китаплар яда оюнчакълар учун оьрге илинген тахчалар къолланма онгайлы кюйде этилмеге герек. Шоланы илегенде уьстюне салма, алма нечик боларны гьакъында ойлашма герек. Аслусу – яшгъа оьз уьюнде рагьат ва онгайлы болмагъа тарыкъ.

Ойнайгъан ва ял алагъан ерлер

Яшны уьюнде хас кюйде къолланардай бир-нече ер болмакъ яхшы: ойнамакъ, ял алмакъ ва охумакъ учун. Шолай болса, яш заманын ва уьйню айланасын пайдалы кюйде къоллама болар.

Ойнайгъан ер. Мунда оюнчакълар, конструкторлар, оьзге оюнлар учун хас ер белгилене. Бу ер яш учун къоркъунчсуз болмакъ агьамиятлы.
Ял алагъан ер. Мунда яш ял алмагъа ва оюнлардан сонг талгъанын басылтмагъа бола. Бу ерде йымышакъ мебель, бойлукълар ва ювургъанлар болма бола.
Охуйгъан ер. Мунда яш дарслар, суратлар этежек, китап охужакъ ва билим булан байлавлу оьзге ишлер юрютежек. Бу ерде яшны чагъына гёре шанжал булан стол ва китаплар учун тахча салына.

Къоркъунчсузлукъ

Къоркъунчсузлукъ – яшны уьюн онгарагъанда лап аслу шартлардан. Мебель, оюнчакълар ва оьзге тарыкъ-герекни алагъанда шуланы гьисапгъа алабыз:

Мююш де, бир зат да итти болма герекмей. Мебель ва оюнчакълар яш учун къоркъунчсуз болма герек, огъар зарал этилмес учун, шоланы мююшю де, бир заты да итти болма герекмей.
Чагъына гёре болмакъ. Оюнчакълар ва оьзге затлар яшны чагъына гёре болма тарыкъ ва ону учун къоркъунчлу болма герекмей.
Материаллар. Мебель ва оюнчакълар сайлайгъанда шолар яшны савлугъуна зарал гелтирмейген материаллардан этилген болма герек.
Терезе. Терезеге айрыча агьамият беребиз: гиччипав терезеден таба къыргъа тюшюп, о янгъа йыгъылып болардай болма герекмей, айрокъда бийик къатда яшай буса.

Яш учун онгайлы уьй тизив – уллулагъа баласыны гьайын этмеге ва гьюнерлерин гёрсетмеге арив имканлыкъ.

Яшланы уьюн онгарабыз: гиччипавланы турагъан ери онгайлы болма герек