Яйда янгыртып къурув башлама унутмайыкъ
Исси гюнлер башланып, табиат чечекленген сонг, ичибиздеги гьалгъа гёре биз де алышынма гьасирет экеник билинмеге башлай.
Йылны ажайып бу вакътисинде янгы муратлар гёз алгъа тутмагъа ва шолагъа багъып абат алмагъа арив заман. Уьюн-ожагъын онгармагъа, оьзюню гьайын этмеге, гьар якъдан яхшы янгъа багъып алышынмакъ учун, къатынгишилеге бек онгайлы вакъти. Чечекленмек ва безенмек учун не этме гереги гьакъда бир-нече ёравлагъа агьамият берейик.
- Уллу жыйышдырыв: тарыкъ тюгюл затлардан къутулабыз, яхшы кюйде чанг сибиребиз, терезелени ва жабарны жувабыз. Булайлыкъ уьйню тазалагъандан къайры, янгы ишлеге ёл да ача.
- Жыйывну ёрукълашдырыв: гьар затны кюцюне гёре айырабыз ва оланы сакъламакъ учун онгайлы ерлер табабыз. Шону учун челтирлер, къутукълар яда такъчалар къоллап, айлана якъны ёрукълу этебиз.
- Аривлюк ва савлукъ: массаж этмеге ва савлукъ учун оьзге ишлени юрютмеге башлайбыз, шолар къатынгишини аривлюгюн артдырар ва савлугъун къатдырмагъа кёмек этер.
- Аш ашав ва спорт: не ашайгъаныбызгъа тергев беребиз, болгъан чакъы кёп овошлар, емишлер ва эт ашама къасткъылабыз. Спорт булан машгъул болма башлайбыз, къыйышагъанын юрютебиз.
- Рагьатлыкъ ва ял алыв: тыныш алыв булан гимнастика этебиз ва шо кюйдеги оьзге пайдалы ишлени къоллама башлайбыз, шоланы кёмеги булан рагьатлыкъ табабыз.
- Ювукъ адамлар булан къатнав: агьлю ва къурдаш къатынлар булан кёп къатнама башлайбыз, ойларыбызны ва гьислерибизни олагъа ачыкъ этебиз, ювукъ аралыкъ юрютебиз.
- Акъча харжлавну гёз алгъа тутув: чыгъышларыбызгъа тергев этебиз, акъча негер харжлажагъыбызны гьакъында алданокъ ойлашабыз.
- Гьюнерлерибизни артдырыв: сайлап табып онлайн-курсларда охуйбуз, касбу бажарывлугъубузну, гьюнерлерибизни артдырабыз ва ишибизде оьрге гётерилебиз.
- Сурат этив, согъув яда тигив: рагьатланма кёмек этеген, авур ойларыбызны басылтагъан яратывчулукъ булан машгъул болабыз.
- Эр булан къатнав: олжагъыз булан болгъан чакъы кёп къатнама, огъар герек чакъы агьамият бермеге, гележекде бирче не этежекни гьакъында ойлашма яхшы.
- Ругь тарбиялайгъан китап охув: оьз-оьзюн оьсдюрювге байлавлу, дин, психология ва философия китаплар охуйбуз, айлана якъны яхшы билмеге къаст этебиз.
- Гёз алгъа муратлар тутув: ювукъ арада негер етишме сюегенибизни гёз алгъа тутабыз ва шогъар етмек учун не этме герекни гьакъында ойлашабыз.
- Не сюегенибизни язабыз: умутларыбызны ва не сюегенибизни язабыз, шолар бизге тюз ёлдан тайышмай юрюмеге кёмек этер.
- Бав ва огород: топуракъ гесек бар буса, гюллер, овошлар, яшылчалар чачып, исбайы яшыл ер онгарабыз. Шагьарда, квартирде яшайгъанланы топурагъы ёкъ буса, терезебашда хадира-хума къоллап, яшыл «атав» болдурма ярай – бу оьсюмлюклер гьаваны тазалагъандан къайры, кепибизни де къолай этер.
- Гезев: янгы ерлеге бармагъа гёз алгъа тутабыз, онда янгы гьислерден байыгъып, ял алмагъа онгайлы.
- Выставкалар: маданият булан байлавлу тюрлю выставкалагъа барып, билегенибизни артдырабыз, гьислерибизни «тойдурабыз».
Йылны исси вакътиси – янгыртып къурувну заманы экенни унутмайыкъ. Янгы ишлени башлама къоркъмайыкъ. Бу вакъти унутулмас арив заман болмакъ учун гьаракат этейик!
