Бир гёзлю ана

Бир гёзлю ана

Бир уланны анасыны
Болмагъан дей бир гёзю,
Бир къанаты сынгъан къушгъа
Ошай болгъан дей оьзю.

Бир гёз булан тувмагъан о,
Экиси де болгъан дей,
Уланына берип гёзюн,
Ана гёзсюз къалгъан дей.

Хатабалагь къобуп яшгъа
Этгенде бир гёзюн тас,
Ана гёзюн савгъат этген
Этмейли уьстюнден яс.

Шо гюн бугюн эки гёзлю
Оьсе болгъан баласы,
Билмей болгъан бирин огъар
Бергенни оьз анасы.

Оьсе улан, англап битмей
Анагъа сый герегин,
Сёзю булан етти ерден
Яра ону юрегин:

«Къурдашларым кюлемсирей
Ананг арив алай деп,
Бир гёзлю болгъанча ана
Болмагъаны къолай», – деп.

Ете бир гюн, ажжал къона
Ананы акъ башына,
Оьлгенчеге кагъыз яза
Жан аявлу яшына:

«Шу гьал салдым, гюлдей эди
Сен айтагъан сыпатым,
Мен гёрмейли сен гёрсюн деп
Дюньялыкъны ниъматын.

Азиз балам, сен геч менден,
Илыкъдырдым оьзюмден,
Оьмюр гетди гёзьяш тёгюп
Шо къалгъан бир гёзюмден.

Мен чи сени кёп сюедим
Сюйкюмсюз юзюм булан,
Тюшлеринге гележекмен
Эки де гёзюм булан».

НУРЬЯНА АРСЛАНОВА