Яхшы амал гиччиден билине
Яхшы амал гиччиден билине
Гюн яхшы болсун, аявлу гиччипавлар, бизин къурдашлар. Бир охувчу къыз булан болгъан ишни гьакъында айтмагъа сюе6из бугюн сизге. Бу ажайып иш кимге де болмагъа бола ва шону эшитсегиз, балики, сизге пайда болур, дарс аларасыз.
«Къышны вакътиси эди. Эртен школагъа бармагъа деп чыкъдым ва гечикмес учун алгъасап бараман. Орам булан алдымда бир къыз бара. Кюйге къарагъанда, ол да бек алгъасай эди. Сонг огъар телефон сёйледи. Телефонун чыгъартагъанда къыз сумкасын ерге тюшюрдю. Тез-тез ичиндегисин сумкагъа жыйып, ол къыз ёлу булан чалт гетди.
Мен шо сумка тюшген ерге ювукъ болгъанда ерде ташланып бир гиччи кюл тюслю бокъчагъа ошайгъан зат гёрдюм. Гётерип къарасам – акъча кисе (кошелёк). Ачгъанда ичинде акъча ва бир-бир карточкалар барны гёрдюм. Тапгъанымны есине къайтармагъа сююп, мен къызны излеп къарадым, тек ол къайда гетгенин гёрмедим.
Сагьатыма къарап, дарсгъа чакъырагъан зенг урмакъ учун 3 минут къалып турагъанын гёрдюм. Гечикмей дарсгъа бармагъа боламан, тек сонг акъчаны есин тапмагъа боларманмы экен? Амма ону излей турсам, дарсгъа гечигежегимни ва такъсырланажагъымны билемен. Бираз ойлашып, шо къызны излемеге чапдым.
Ювукъ арада автобус токътайгъан ер ёкъ, демек ол шогъар минип гетмеген. Нечик алай да, гёзюм гёреген ёл булан, ари-бери къарай туруп бараман. Ёл ягъадагъы тюкенден оьте турагъанда, шондан бу къыз чыгъагъанны гёрдюм. Ону гёрюнюшю пашман йимик эди, мен буса бек сююндюм: негьакъ дарсдан къалмагъанымны сездим.
Мени ва оьзюню кошелёгюн гёрюп бу къыз тамаша болду. Мен огъар болгъан кюйню тез англатып, чаба туруп школагъа гетдим.
Барагъан ёлумда учителим урушмас учун не айтагъанны гьакъында ойлашаман. Айтса инанмагъа да къыйын иш чи.
Насипге, муаллим магъа урушмады. Янгыз дагъы гечикмей гелмекни гьакъында тиледи. Арты булан мен тюз этдим деп де къошду.
Магъа болгъан иш шону булан битер деп ойлаша эдим. Амма бу хабарны арты да болгъан, ажайып узатылды шо гюн башлангъан иш.
Артындагъы гюн танапусну вакътисинде магъа муаллимим гелди. Ол айтгъан кюйде, акъчасын тас этген къыз – ону къызы болгъан. Биз экибиз де булай болгъангъа бек тамаша къалдыкъ. Муаллимим магъа бирдагъы керен баракалла сёзлер айтды.
Гёресиз, яшавда не де бола экен ва мен дарслагъа гечикгеним тегин болмады. Оьзюм дурус этмеге болгъаныма бек сююндюм».
Гертиден де, бек тамаша иш болду бизин охувчубузгъа. Аслусу – муаллим де тюз янашды огъар. Яшлар, сизге шолай болса, не этер эдигиз? Яшавугъузда бугъар ошашлы тамаша ишлер болгъан буса яда къужурлу хабарлар эшитген бусагъыз, язмагъа боласыз, биз шо хабарланы печат этербиз, Аллагь ﷻ буюрса.
