Таравих намаз

Таравих намаз – шо сюннет намаз, ону рамазан айны узагъында, яссы намаздан сонг къыла.

Ону рамазан айны 1-нчи гюнюнден башлай. Таравих намазны жамият булан межитде этмек макътала, шолай этип болмагъанда, уьйде янгыз къылмагъа да ярай. Аслу гьалда таравих намазда 8 ракаат, экишер ракаат этип 4 намаз къылына. Тек 20 ракаатны – экишер ракаат этип 10 намаз къылса, лап яхшы. Бизин Пайхаммар ﷺ башлап экишер ракаатлы 10 намаз эте болгъан, ондан сонг жамиятгъа енгиллешдирмеге 8 ракаат булан тамамланып къалгъан. Таравих намаз битгенде, жамият булан 3 ракаатлы витру намазны да къылма тюше (башлап эки ракаатлыкъ намазны, сонг дагъы да бир ракаатны).

Таравих намазны къылывну низамы

Таравихде эки ракаатлыкъ намазлардан дёртню яда онну эте. Оланы арасында охуйгъан дуалар тюпде бериле. Яссы намаз ва ратибат (сюннет намаз) къылгъан сонг биринчи дуа охула. Шо дуаны биринчи ва уьчюнчю таравих намазлардан сонг да охуй, биринчи эки ракаатлыкъ витру намаздан сонг да охуй. Экинчи ва дёртюнчю таравих намазлардан сонг уьчер керен экинчи дуаны ва бирер керен биринчи дуаны охуй. Витру намаз битгенде, демек, экинчи (бир ракаатлы) витру намаздан сонг уьчюнчю дуаны охуй. Шо уьч де дуаны намаз этегенлер бирге къычырып охуй.

Таравихлени арасында охулагъан дуалар

1. «Ла гьавла ва ла къуввата илла биллагь. Аллагьумма салли ала Мугьаммадин ва ала али Мугьаммадин ва саллим. Аллагьума инна насъалукал жанната ва ннаузубика минаннар».

2. «Субгьана ллагьи вал-гьамду лиллагьи ва ла илагьа илла ллагьу ва ллагьу Акбар Субгьана ллагьи гьадада халкъигьи ва ризаа нафсигьи ва зината гьарщигьи ва мидада калиматигь».

3. Субгьанал-маликил-къуддус (эки керен). Субгьана ллагьил-маликил къуддус, субугьун къуддус раббул малаикати вар-ругь. Субгьана манн тагьаззаза билкъудрати вал-бакъаъ ва къагьагьарал ибада бил-мавти валь-фанаъ. Субгьана раббика ррабил гъизати амма йасифун ва саламун алал мурсалина ва вал-гьамду лилагьи ррабил аламин».