Гюнагьлардан чаягъан ва берекет гелтиреген вакъти

Ассаламу алейкум ва рагьматуллагьи ва баракатуху!

Аявлу къардашлар ва къызардашлар!

Гюнагьлардан чаягъан ва берекет гелтиреген рамазан айны бизге савгъат этген саялы – Яратгъаныбызгъа макътав болсун.

Рамазан бары да бусурманлар учун лап абурлу ва лап агьамиятлы ай. «Рамазан» дегенде иманы бар гьар кесни юрегинде сююнч тува, ажайып ай гелгенлик ичибизде айрыча гьислени хозгъай. Бу ай – сынавланы, ибадат ва битмес шабагъатланы вакътиси. Шо шабагъатны оьлчевюн янгыз бир Аллагь ﷻ биле.

Юрегинде къатты иманы, гьакъ ювашлыгъы булан рамазан айда ораза тутагъан, гечелени ибадат этип йибереген бусурманланы санаву йылдан йыл артагъан саялы, Есибизге битмес макътав болсун. Амма шолар булан бирче, сав ай чыдап болмасман деп къоркъуп, ораза тутмай къоягъанлар да бар. Шолайлагъа Мугьаммат Пайхаммарны ﷺ шу гьадисин эсине салмаса ярамас: «Бир гюн ораза тутгъан гишини де, жагьаннемни отуну да арасында Есибиз Аллагь ﷻ генглиги кёкден ерге чакъы мезгилдеги ор яратар» (ат-Табарани).

Шу дюньяда бир шабагъат булан да тенглешдирме болмайгъан даражада, ораза тутагъан гьар мюгьлет учун, Аллагьдан ﷻ шабагъат алма болагъаныгъызны билигиз. Шу айда оьзюбюзню яхшы янгъа багъып алышдырмакъ учун бек къаст этме тарыкъбыз. Бир-бирибизге абур этейик, тарыкълылагъа кёмек къолубузну узатайыкъ, булар бек агьамияты ишлерден.

Расулуллагь ﷺ булай айтгъан: «Рамазан айда юрегинде иман ва Аллагьдан ﷻ шабагъат боларгъа умут булан ораза тутгъан гишини алдагъы гюнагьлары гечилир» (аль-Бухари, Муслим).

Яратгъаныбыз алда этген гюнагьларындан гечип, тутгъан оразаларыбызны къабул этилгенлени арасына биз барыбыз да гирежекге бек умут этемен.

Бары да бусурманланы бу сыйлы ай геливю булан къутлайман, бир мюгьлетни де зая йибергенмен деген гьёкюнч болмайлы, шу вакътини ибадат булан оьр даражада оьтгермекни гьакъ юрекден ёрайман.

Дагъыстанны муфтиси Агьмат-афанди Абдулаев