Къарабудагъгент районну мавлети
Бугюнлерде бусурман уьммет учун сыйлы айланы бириси – раби-уль-аввал – бизин уьстюбюзге гелген. Шу айда бизин Есибиз Аллагьгъа ﷻ ва сыйлы Пайхаммарыбыз Мугьамматгъа ﷺ макътавлар этмеге, зикру ва мавлетлер охумагъа, лап да яхшы ибадатлардан гьисаплана.
Шону гёз алгъа тутуп, Къарабудагъгент район администрацияны башчысы Магьмут Амиралиев Мугьаммат Пайхаммарны ﷺ аты къоюлгъан янгы къурулагъан уллу межитде савлай районну жамиятыны атындан Аллагьгъа ﷻ ва Пайхаммарыбызгъа ﷺ макътавлар этмек ва назмулар охумакъ учун сыйлы мердеш оьтгермекни таклиф этди. Шо таклифни районну ичиндеги юртланы халкъы, къурумланы ёлбашчылары ва къуллукъчулары бир гёнгюлден якълады.
Шо эсгерилген шатлы ва сыйлы мажлис Мугьаммат Пайхаммарыбызны ﷺ аты къоюлгъан межитде раби уль-аввал айны 7-нде ахшам вакъти оьтгерилди. Озокъда, гелген халкъгъа бек арив насигьатлар этилди, назмулар айтылды, гьатта гиччипавлар динге байлавлу оьзлени чыгъышларын гёрсетди.
Олай да, мажлисни барышында районну имамларыны Советини ёлбашчысы Ильяс Умалатов, районну тамазаларыны Советини ёлбашчысы Абдулгьамит Мамагишиев сёйледилер, Жамал Даутов, агъа-ини Муслим ва Ислам Абулакъовлар назмулар айтдылар.
Чараны вакътисинде школаланы охувчулары, Агъачавул, Губден ва Къурбуки юртланы яшлар бавларыны гиччипавлары сыйлы аятлар ва назмулар охудулар, гиччирек мюгьлетлер гёрсетдилер. Оьзюню гючюн чараны ортакъчыларына белгили кочап (силач) Омар Гьанапиев де аян этди. Интернатны, школаланы ва яшлар бавларыны яшлары сурат этив конкурсда да гьаракатчылыкъ кюйде ортакъчылыкъ этди.
Мажлисни оьтгермеге бойнуна алгъан районну гьакимбашы Магьмут Амиралиевни, къолун узатгъан дагъы да ёлдашланы атларына лайыкълы сёзлер айтылды. Оьтгерилген мажлисге чакъырылгъан халкъгъа бек арив татывлу ва пайдалы ашлар ва татли сувлар да берилди. Чинкдеси, мажлисде чёп салыв къайдада 7 адамгъа умрагъа бармагъа сертификатлар тапшурулду.
Этилген мажлисни Аллагь ﷻ къабул этсин, мажлисге гелгенлеге зувап язылсын!
