Къурбан гюнню (Ид аль-Адха) байрам намазы

Къурбан гюнню (Ид аль-Адха) байрам намазы

Къурбан байрам гюнню (Ид аль-Адха) байрам намазын къылмакъ – этмеге бек яхшы ишлерден санала (суннат аль-муаккада). Пайхаммар ﷺ шогъар бек агьамият берегени ва къоймай къылагъаны саялы, бир-бир алимлер гьисап этеген кюйде, байрам намаз – жамиятны борчу (фарз уль-кифаят) санала.

 

Байрам намазны вакътиси – зуль-гьижжа айны 10-нда танг къатгъан сонг башлана ва шо гюн гюнеш лап оьр ерине гётерилгенче узатыла (демек, тюш намазны азаны эшитилгенче бираз алдын).

Имамны артына тюшюп, жамият булан байрам намазны къылмагъа болмагъан гиши буса, шону оьзю де къылмагъа бола. Эгер эсгерилген вакътиге етишип болмагъан буса, шо намазны, оьзге сюннет намазланы йимик, тёлеп къылмакъ яхшы болур.

Байрам намазны уьйде къылагъанлар да, агьлюсюн жыйып (къатыны, яшлары, анасы, къызардашлары булан), шону жамият булан къылмагъа бола. Олай да, бу намазны сапардагъылагъа да къылмакъ яхшы болур.

 

Байрам гюнню эдеплери ва этмеге яхшы ишлер

Эки де байрам намазланы алдында киринмек яхшы санала. Шону вакътиси алдындагъы гечени экинчи яртысындан башлана, тек намазгъа бармагъа деп уьйден чыкъгъанча бираз алдын киринсе, лап яхшы гьисаплана. Жамият намазгъа къошулажагъына-къошулмажагъына къарамай, шо гюн бары да адамгъа киринмек яхшы.

Чач гесив, тырнакъ къыркъыв, къаркъарадан яман ийис тайдырыв, атир ийислер себив, арив опуракъ гийив: демек оьзюню гьайын этмек булан, байрам намазгъа алданокъ гьазирленсе яхшы болур.

Къурбан байрам гюн, байрам намазгъа уьйден чыгъагъанда, ашамай чыкъса яхшы, неге тюгюл шо гюн биринчи ашыбыз къурбанны эти болса яхшы.

Байрам гечелени ибадат булан оьтгермек агьамиятлы экенни унутмагъа тюшмей. Гьар кимге де гечелени бир гесегин сама да, намаз къылыв, Къуръан охув, Есибизни эсгерив (зикир), Яратгъаныбызгъа алгъыш-тилеклер булан ялбарыв, гюнагьлардан чайылмакъ гьакъда дуа этив, Пайхаммаргъа ﷺ макътавлар ва салават салыв булан йибермеге къыйын болмасдыр.

Байрам гюн адамланы юреклерин сююндюрмек, къардашланы ва танышланы уьстюне барып, байрам булан къутламакъ, амалсыз яшайгъанлагъа садагъа оьлешмек бек яхшы ва илиякълы болур.

Есибиз Аллагь ﷻ сойгъан къурбанларыбызны, этген садагъаларыбызны ва оьзге яхшы ишлерибизни къабул этерге умут этебиз ва шо гьакъда тилейбиз.

 

Абдулла Магьамматов

 

2026-07-01 (Мугьаррам 1448 г.) №7.


Сорав – жавап

– Гебин къыйып, уьйленмек учун айрыча арив вакъти боламы? – Шаввал ва сафар айларда гебин къыйып, уьйленмек этмеге яхшы деп санала (желательно). Неге десе Расулуллагь ﷺ Айша булан шаввал айда уьйленген, къызын Фатиманы буса Алиге сафар айда берген. Гебин къыйывну дыгъарын (никягь)...


Яшыртгъын сырлар ачылмай къалмас

Адам улланасыны уьюню къырыйындан оьтюп бара. Уллу ажай торунларын (внуки) гёрмек учун булагъа бир-нече гюнге къонакълай гелген. Уллана телефондан булан сёйлей ва улан ону бу сёзлерин эшите: «Яшыртгъын сырлар къачан буса да ачылмай къалмас». Эртенги ашны заманында ол...


Гюнагьлыбыз биз Аллагьны ﷻ алдында…

Газетибизни уьчюнчю бетинде пагьмусу арагъа чыкъмагъа башлагъан шаирибиз Умар Биймурзаев булан баянлыкъ этип, охувчуларыбызгъа, халкъыбызгъа ону таныш этме тийишли гёрдюк. Бу бетде буса, Умар яратгъан шиъруланы тергевюгюзге беребиз.   Гюнагьлыбыз биз Аллагьны ﷻ алдында… Къара кюлге...


Кёп сюеген Пайхаммарыбызны ﷺ гьакъында бек билейик

(Давамы. Башы алдагъы номерлерде)   Расулуллагьны ﷺ байлыкъгъа янашыву   Самак бин Харб хабарлагъан кюйде, ан-Нуъман бин Башир асгьабалагъа багъып булай айтгъан болгъан: «Ашгъа ва сувгъа байлавлу артыкълыкъ юрютмеймисиз дагъы? Мен сизин Пайхаммарыгъызны ﷺ къурсагъын тойгъанча...


Рызкъы артмакъны себеплери

Бу дюньяны себеплеге кюрчюлю этип яратгъан Аллагьгъа ﷻ макътав болсун. Масала, терек оьсмек учун, бир башлап ону орнатма тарыкъ. Билимли болмакъ учун, муаллимни алдына барып, охума тарыкъ. Нени буса да сатып алгъанча ондан алда къазанып акъчалы болма герек. Рызкъы булангъы ишлерде де, Къуръанда ва...