Кёп сюеген Пайхаммарыбызны ﷺ гьакъында бек билейик
Кёп сюеген Пайхаммарыбызны ﷺ гьакъында бек билейик
(Давамы. Башы алдагъы номерлерде)
Расулуллагьны ﷺ савуту
Расулуллагьны ﷺ айлана якъдагъы гьар-тюрлю затлагъа, савутгъа, байракъгъа, оьзге малгъа ва гьатта миник (верховое) гьайванлагъа ат береген хасияты болгъан.
Пайхаммарны байрагъыны аты «Аль-Укаб» («къаракъуш») болгъан.
Абу Хурайрадан етишген бу гьадисни имам Ибну Адий гелтире: «Расулуллагьны ﷺ къара тюслю байрагъы болгъан, шону аты “Укаб” болгъан».
Пайхаммар ﷺ бир-бирде байрагъыны тюсюн яшыл тюсге, башгъа заманда къара гьызлары булангъы акъ тюслюсюне алышдыра болгъан.
Пайхаммар ﷺ къошуна (палатка) «Аль-Кинна» («яшынагъан ер», «уя») деген ат такъгъан.
Пайхаммар ﷺ къолунда юрютеген таягъыны аты «Аль-Мамшука» («исбайы») болгъан. Бу таякъны Пайхаммар ﷺ гечинген сонг, бусурманланы халипалары биринден-бирине бере болгъан.
Пайхаммар ﷺ гьатта хабасына да «Аль-Раййан» («толгъан», «токъ») деп ат къойгъан. Олай да, Расулуллагьны ﷺ оьзге хабалары, сув ичеген башгъа савуту болгъан. Пайхаммар ﷺ сапаргъа чыгъагъанда ёлда сув ва сют ичмек учун алагъан савуту болгъан, ону аты – «Ас-Садира» («чыгъагъан», демек сувсаплыгъын басылтагъан) болгъан. Ер (седло) – «Ар-Ража» («аталанмакъ, къартылламакъ»), къайчы – «Аль-Жамиа» («бирикдиреген»). Пайхаммар ﷺ давгъа оьзю булан алагъан къылычыны аты – «Зуль-Фикар» («кертлевню (надрез) еси» – къылычны бир янында аркъа сюекге ошайгъан оюлуп этилген гьыз болгъан). Бу къылыч булан Пайхаммар ﷺ Бадр къазаватда да дав этген, Макканы къолгъа алагъанда да ону янында болгъан. Мундан къайры Расулуллагьны ﷺ дагъы да алты къылычы болгъан.
Пайхаммарны ﷺ гёнден этилген белбавуну уьстюнде гюмюшден этилген уьч юзюк, илгик (затёжка) ва тогъа (пряжка) болгъан.
«Ихьяу улуми ддин» деген китабында имам аль-Гъазали язагъан кюйде, Пайхаммарны ﷺ окълары булангъы садакъы (колчан) болгъан ва ону аты – «Аль-Куфар» («яшырагъан»). Имам аль-Табарани етишдирген кюйде, Ибну Аббас айтып, Пайхаммарны ﷺ «Аль-Саддад» («тюз урагъан») деген окъжаясы ва «Аль-Жамъу» («жыймакъ») деген садакъы болгъан.
Пайхаммарны ﷺ тиши тюесини аты – «аль-Касваъ» («къысгъа къулакъ», неге тюгюл ону къулакъларыны бир гесеги гесилген болгъан). Бу тюеге минип, Расулуллагь ﷺ Маккадан Мадинагъа гьижра этип гёчген болгъан. Бу тюеге «аль-Азбаъ» деп де айта болгъан, къулагъы бираз гесилген гьайванлагъа айтылагъан ат. Пайхаммарны ﷺ акъ тюслю «Дулдул» деген къачыры да (мул) болгъан. Пайхаммаргъа ﷺ ону Мисрини пачасы Мукавкис савгъат этген. Сапаргъа чыгъагъанда Пайхаммар ﷺ бу къачырны оьзю булан кёп ала болгъан. Пайхаммар ﷺ ону уьстюне арпа салып ташыгъан. Расулуллагь ﷺ герти дюньягъа гёчгенде бу къачыр сав болгъан. Пайхаммар ﷺ оьлген сонг ону узакъ заман сакълагъан, артда да тишлери тёгюлюп, сокъур болуп Дулдул къартлыгъындан оьле.
Олай да, Пайхаммарны ﷺ «Яъфур» («къубагийикни баласы») деген эшеги де болгъан. Бу эшек бек чабагъан саялы шогъар шолай ат бериле. Башгъа риавятгъа гёре буса, Яъфур – къыр сыйырны (бизонну, оьгюзню) баласыдыр. Пайхаммаргъа ﷺ ону Фарват бин Амр аль-Жазамийу савгъат этген. Яъфур Пайхаммар ﷺ савболлашыв гьаждан къайтгъан сонг оьле.
Пайхаммарны ﷺ «Уфайр» («къыр къабанны баласы») деген башгъа эшеги де болгъан. Ону да Пайхаммаргъа ﷺ Мукавкис савгъат этген.
(Давамы гелеген номерде)
