Хош гелдинг, сыйлы рамазан ай!
Хош гелдинг, сыйлы рамазан ай!
Ассаламу алейкум, аявлу охувчулар. Уьюгюзге яхшылыкъ болсун, ожакъларыгъыз ораза айны берекетинден толсун!
Аянывну, хозгъалывну заманы гелди. Шолай деп айтагъаным, гьар ким де этеген ишине, гьатта ибадатына да уьйренчикли болуп къала. Демек, бизин битимибиз ажайып кюйде ясалгъан ва гьар гюн кютеген борчларыбызгъа эринчеклик яда ялкъывлукъ къошулмакъ бар. Даим этилеген не иш де ялкъывлу болуп къала чы бир-бирде. Шо саялы Есибиз Аллагь ﷻ бизин «юхлап» турагъан гьалыбыздан йылда бир керен «силкип» яхшы уята, гьаракатыбызны жанландыра. Тангда шардангъа уяныв, гюнню узагъында ашамай турув, ойланы янгыз бир Аллагь ﷻ булан байлап, ахшам агьлю тепсини айланасында жыйылып, ораза ачыв – къаркъараны къувнакълы эте, юрекни жагьландырта.
Гече таравигь намазларда буса, бусурман уьммет бирлигин сезе, аралыкълар ювукъ бола. Ораза ай ругьубузгъа шонча да уллу таъсир эте, гьатта сонг рамазан битгенни де сюймей къалабыз. Башлапгъы гюнлер къаркъара азмаз къыйнала, шону ду терен маънасы бар – амалсыз яшайгъанлар, ашамагъа ашы етишмейгенлени гьалын тынч англамагъа болабыз ва ичибизде олагъа бакъгъан языкъсыныв гючлене, арта. Сонг ай бите туруп, гьалыбыз алышынмагъа башлагъанны гьис этебиз. Рамазан айны имангъа этеген таъсири тамаша кюйде гючлю бола. Булайлыкъ булан айыныв, чечекленив, янгыртыв эс этиле. Ораза тутмакъны имангъа гелтиреген пайдасы сав йылгъа, гелеген рамазангъа ерли узатыла.
Бусурманлар ажайып гьал гелгенлигинден Есибизге шюкюрлюк эте, яшавгъа янгыртылгъан гёзден къарайгъан бола. Шулай тамаша девюр башлана тура бизге. Яратгъаныбыз бары да иманы барлагъа гюч булан савлукъ берсин деп тилейбиз, гьасирет къалгъанлар чола болуп, оразасын тутмагъа болмакъны ёрайбыз. Гьар оьтген гюн пайдабызгъа айлансын, этеген ибадатларыбыз иманны беклешдирсин. Гьарибизге шу геле турагъан гюнлени ёрукълу, бир мюгьлетин де зая этмей оьтгермекни ёрайбыз, Есибизден этген яхшы ишлерибизни къабул этсин деп де тилейбиз.
