Сыйлы ерлерде бизин учун да дуа этигиз

Ассаламу алейкум, аявлу охувчулар. Уьюгюзге яхшылыкъ болсун. Яшавну барышына гёре, гюнлер, айлар гете ва бусурман рузнама булан гьар иманы барны яшавунда инг агьамиятлы сапарыны вакътиси ювукъ болду. Имканлыгъы бар бусурманлар гьаж къылма онгарыла, юреги алгъасап, ёлгъа чыгъажакъ мюгьлетин санай.

Сыйлы ерлерде болмагъа бары да иманы барлар гьасирет, Есибиз Аллагь ﷻ чакъырып, биревлеге мурадын яшавгъа чыгъармагъа насип бола, башгъалар бозаргъан кюйде къала… Къысмат бир йимик болмай. Амма нечик болса да, умут уьзме ярамас, ёкъ ерден де ёл ачылмакъ бар. Бир-нече йыл алда дюньядагъы бусурманлар Сауд Арабстангъа барып да болмай эди. Гьали буса, бары да барулар тайгъан, гьатта гетген йыл 65 йылдан уллулар гьаж къылма болмай эди буса, бу йыл шо да дазуланмай. Гьаж къылмакъ учун квоталар да оьсген. Аллагь ﷻ рази болсун, Сулейман Керимовну чомартлыгъы булан бу йыл да имканлыгъы ёкъ бир минг дагъыстанлы гьаж къылмагъа болажакъ.

Гёресиз, дюнья айлана, гьамангъы гьал бир ерде токътамай, къаравулланмагъан якъдан имканлыкълар тувуп йибере ва натижада умутлар яшавгъа чыгъа. Бизден болагъан зат – дуа этмек, Аллагьдан ﷻ тилемек. Дуа къабул болмакъны да оьз къайдасы, ёругъу бола. Шо гьакъда газетде язылгъан эди, пайда алмагъа сюегенлер эсинде сакълагъандыр.

Бу гюнлерде къардашларыбызны, танышларыбызны ёлгъа узата туруп, Аллагьгъа ﷻ аманат болсун деп ёрайбыз, ёлу енгил болгъаны сюебиз ва эсен-аман гьаж борчун кютюп, уьюне къайтажагъын гёзлейбиз. Гьаж къылагъанлар сынавлардан оьте, иссиликге чыдама герек ва къаркъара чыныкъмагъан буса, бу сапар авур тие. Шо саялы алданокъ гьазирлик болса яхшы. Билим якъдан да тийишли кюйде онгарылма тарыкъ. Гюпню ёлбашчысына бютюнлей таянып къалмай, гьар ким оьзю де аста-аста гьазирленсе, гьажны рукнуларын билсе яхшы.

Гьажны лап жаваплы ери – Арапа гюн айрыча жыйнакълы болма герек. Шо гюн этилген дуа къабул бола деп айтыла.

Гьаж къылма барагъанлар! Оьюзюгюзню гьакъында дуа этегенде, къалгъан бусурман уьммет учун да алгъыш этигиз хари, деп мунда къалгъанлар тилейбиз. Биз Есибиз Аллагьгъа ﷻ тынглавлу къуллар болмакъны, бизге ва бизин ювукъ адамларыбызгъа иманлы-динли болмакъны, гьакъ юрекли таза бусурман болмакъны гьакъында тилегиз. Гьар-тюрлю балагьлардан Есибиз арек этсин, бир-бирибизни арабыздагъы оьчлюкню, эришивлюкню ёкъ этсин. Ихтиярлары къыйыкъсытылгъан бусурманлагъа Яратгъаныбыз кёмек этсин деп тилегиз. Зулмучуланы заралындан сакъласын, парахат яшав берсин, чечекленив болсун деп алгъыш этигиз. Ватаныбызда къалгъан биз, гьар дуагъызгъа «Амин, амин», – дейбиз.