Янгы йыл – янгы умутлар

Янгы йыл – янгы умутлар

Ассаламу алейкум, аявлу охувчулар. Уьюгюзге яхшылыкъ болсун. Яшавну агъымы оьзюню кюю булан бара, гюнлер ва айлар гете, йыллар бири битип, башгъасы башлана. Арт вакътилерде заман чалт гетегенде йимик гёрюне. Муна, арадан бирдагъы йыл гетип, бусурман рузнама булан мугьаррам ай булан янгы йыл ихтиярларына гирди.

Гетген йыл шулай вакътиде язгъан сатырларым бугюн язгъандай эсимде. Гьар кимге оьтген мезгилни эсине гелтирип, етишген уьстюнлюклерине, къоймагъа болгъан кемчиликлерине багьа бермеге чакъыра эдим. Гьали де, энниден сонг да ва гьатта йылдан йыл да гьар инсан яшап барагъан кююне гёре оьз-оьзюне гьисап бермеге, шолайлыкъны мердешге айландырмагъа болабыз. Пайдасы болса, заралы болмас.

Бусурман адам учун тувгъан гюн сююнмеге, байрам этмеге герекли гюн тюгюлдюр, шо да, янгы йыл башланагъанда йимик, бир ажайып тархдыр. Оьтген замангъа гёз къаратагъан, ойлашмагъа чакъырагъан белгилер деп гьисап этме ярайдыр. Бир гьакъыллы адам гьар гече юхлама ятагъанда шо гюн этген ишлерин тергемеге чакъырагъанны охугъанда, шолай этмеге арив гёрген эдим, ич низамны къолайлашдыра деп эсиме геле. Шо кюйде уллу «имтагьамдан» (экзамен) йылда бир яда эки керен чыкъсакъ, ёрукълу болажакгъа шекленмеймен.

Бир ерде токътап турмас учун, гьалыбыз яхшы болсун ва даражабыз оьссюн учун бир ёл сайлама герекдир. Аллагьны ﷻ яхшылыгъы булан бусурманларбыз (шюкюр, альгьамдулиллягь), Ислам динни юрютебиз. Кёплерибиз, аслу борчланы (фарзланы) кютегеник булан дазуланып къалабыз. Пайхаммарны ﷺ сюннетин жанландырмагъа яхшы экенни буса, унутабыз яда юрютмеге эринебиз.

Бусурманны яшаву, ибадат ёлу бир ерде токътамай оьсюп тербесе, уьстюнлюкге етишмеге кёмек этер. Бизин учун уьстюнлюк – Есибиз Аллагьны ﷻ разилигин къазанмакъ. Бютюн негетибиз шогъар бакъмагъа герекдир. Талайлыкъ да, Яратгъаныбызны разилиги де – бир ишдир, мурадыбыз да шогъар бакъдырылгъан.

Динибиз уьйретеген кюйде, иманы бар адам нечакъы гюнагь этген буса да, нечакъы яманлыкъ яратгъан буса да, Аллагьны ﷻ гечивюнден умут уьзмеге герекмей. Этген терс ишлеге гьакъ юрекден гьёкюнюп, товбагъа тюшюп, янгы яшав яшамакъ бирт де геч болмас. Ичибизде жан бар туруп, Къыямат гюн гелгенче, Аллагь ﷻ гечерден пайдаланма болабыз. Яхшы якъгъа багъып алышынмакъ учун имканлыкъны гьакъылы бар адам къутгъармас. Балики, янгы йылдан тутуп алышынмагъа башлар…