Гийинеген кююбюз нечикдир?

Гийинеген кююбюз нечикдир?

Ассаламу алейкум, аявлу охувчулар. Уьюгюзге яхшылыкъ болсун. Бугюн гётермеге сюеген масъала биревлеге онча агьамиятлы гёрюнмесе де, тек бусурманланы тыш гёрюнюшю бизин учун маъналы экенге гёре, иннемей турмагъа дурус болмас деп эсиме геле.

Ислам дин яшавну бары да янларын ёрукълашдыра болгъан сонг, иманы барланы опурагъы да, озокъда, бир-бир талаплагъа къыйышагъан болмагъа герек. Булай дегенде, аслу гьалда, къатын-гишини опурагъы гёз алгъа геле ва гьижап масъаланы гьакъында айтылажакъ деп ойлашасан.

Амма эргишилер де ёрукълу ва арив гёрюнюшлю болмагъа тийишли экени ялгъан тюгюл. Алда-нокъ айтмагъа герек, гьалиги заманда эргиши-къатынгиши деген англавлар иш этилип булгъан-магъа къарай. Ислам дин шолайлыкъны гери ура ва, белгили кюйде, эргишиге ошамагъа къаст къылагъан тиштайпа ва, олай да, къатынгишиге ошашлы эргиши – экиси де налатлана ва бек эр-ши ишлерден санала. Мунда англашылмайгъан зат ёкъдур деп эсиме геле. Эргишилени тыш яны кёп затны талап этмей.

Ону азында ябылмагъа герекли ерлери белгили, тек бютюн къаркъара опуракъны «ичинде» болса бирден-бир яхшы ва макътавгъа лайыкълы. Шону булан бирче, опуракъ таза болмагъа ге-рек ва бюрюш-чюрюш тюгюл. Нечик алай да, бусурман адамгъа къарагъанда, ону уьстю-бою арив, сукъланардай исбайы болмакъ яхшы деп санала. Амма гьалиги заманда, къайдагъы «мода-ны» артындан чабаман деп, бирбиревлер кюлкюлю гёрюне. Бир масхарада айтылагъан кюйде, клоунлар айлана якъгъа къарап, не гиегенни билмей къала, шонча да гьал алышынгъан.

Мисал учун, тамаша гёрюнсе де, йыртылгъан опуракъ гиймек арив деп санала. Биревлер безен-мек учун гьатта янгы шалбарыны тобукъларын къайчы булан гесип де «онгара». Ягъари, ал за-манларда тешилген опуракъны адамлр ямав салып кюйлей эди, гьали буса терсине эте. Бу дюнья тайышгъан деп нечик айтмассан?! Хыйлы йыллар алда америкалы бир жамият чалышыв-чу африкалы ярлыланы авур гьалына агьамият бакъдырмакъ учун, оланыки йимик тешик-тешик опуракъ гие ва гьар йыл бир гюн шолай парпача булан орамгъа чыгъа болгъан. Гёресен, авамлар масъаланы маънасын тюз англамай, терс мода чыгъарып къоя.

Эрши гёрюнеген затланы адамлар этмеге нече де амракъ болгъан экен. Бусурманлар оьзлени шолай юрютегенде бирден-бир жиргенчли, неге тюгюл таза ва исбайы гёрюнмеге герекни ор-нунда къайдагъы тиленчилер яда «бомжлар» йимик болмагъа къарай ва шону учун акъча да тё-лей. Гьар заман янгы-янгы опуракъ алмагъа болмасакъ да, таза ва итив урулгъан тыш гёрюнюш-ню сакъламагъа болабыз чы. Айтывгъа гёре, опуракъ булан къаршылай... Шо саялы ятлар бизге къарагъандокъ: «Бу чу бусурман адам болмагъа герек», – деген кюйде арив ва исбайы гийинмеге герекбиз.