Таравигь намаз – къылагъан кюю
Таравигь-намаз – рамазан айны вакътисинде, яссы намаздан сонг къылынагъан сюннет намаз. Ону ораза ай башланагъан гюнню алдында къылмагъа башлай ва ораза тутагъан ахырынчы гече битдире.
Абу Гьурайра етишдирген гьадисде булай айтыла: «Рамазан айда Есибизни шабагъатына инанмакъ ва умут булан намаз къылгъан гишини алда этилген бары да гюнагьлары гечиле» (аль-Бухари, Муслим).
Таравигь-намазны жамият булан межитде къылмагъа яхшы, шолай имканлыкъ ёкъ буса, агьлю яда хоншулар булан уьйде къылма да ярай. Гьатта дагъы болмагъанда янгыз къылмагъа да бола.
Аслу гьалда таравигь-намазны сегиз ракаат этип къыла: эки ракаатлы дёрт намаз, тек бары да йигирма ркаатны, демек он намазны къылмакъ яхшы болур. Таравигь-намаз къылып битгенде уьч ракаат витру намаз къыла (башлап эки ракаат, сонг бир ракаат).
Таравигь-намазны къылагъан кюю
Таравигь-намаз эки ракаатлы дёрт яда он намаз этип къылына, шоланы арасында охумагъа яхшы дуалар да бар.
- Яссы намазны ва ратибат (сюннет) намазны къылгъан сонг, дуа охула (биринчи дуа).
- Таравигь-намаз къылына (эки ракаат).
- Биринчи дуа охула.
- Экинчи таравигь-намаз къылына (эки ракаат).
- Экинчи дуа охула, сонг – биринчиси.
- Уьчюнчю таравигь-намаз къылына (эки ракаат).
- Янгыдан биринчи дуа охула.
- Дёртюнчю таравигь-намаз къылына (эки ракаат).
- Янгыдан экинчи ва биринчи дуа охула.
- Эки ракаатлы витру-намаз къылына.
- Янгыдан биринчи дуа охула.
- Бир ракаатлы витру-намаз къылына.
- Уьчюнчю дуа охула.
Таравигь-намазланы арасында охулагъан дуалар
Биринчи дуа: «Ла хавла ва ла къуввата илла биллягь. Аллагьумма салли ала Мугьаммадин ва ала али Мугьаммадин ва саллим. Аллагьумма инна насъалука ль-жанната фа наузубика минан-нар».
Экинчи дуа: «СубгьанАллагьи ва ль-гьамдулиЛлягьи ва ла илагьа иллаЛлагьу ва Ллагьу Акбар. СубгьанАллагьи адада халкъигьи ва риза анафсигьи ва зината аршигьи ва мидада калиматигь» (кьч керен).
Уьчюнчю дуа: «Субгьана ль-Малики ль-Къуддус (эки керен). СубгьанАллагь иль-Малики ль-Къуддус, суббугьун Къуддус, раббу ль-малаикати ва p-pyгь. Субгьана манн тааззазаби ль-къудрати валь-бакъаа ва къаххар аль-ибадаби ль-мавти валь-фана. СубгьанаРаббика рабби ль-Иззати аммая сифун ва саламун ала ль-мурсалина валь-гьамду ли Ллягьи Рабби ль-Аламин».
Бу дуаланы намаз къылагъанлар барысы да тавуш этип бирче охуса яхшы.
Оьрде язылгъан ишлер битгенде шу дуа охула: «Аллагьумма инни аузубири зака мин сахатик, ва бимуафатика мин укъубатика, ва аузубика минка ля ухсисанаан аляйка, анта камааснай тааля нафсика».
Аявлу къардашлар ва къызардашлар! Есибиз буюрагъан кюйде шу берекетли айдан сююнейик. Болгъан чакъы кёп яхшы иш этейик, ибадатгъа берилейик, дуа-алгъышдан пайдаланайыкъ. Тилибизни айтды-къуйтдудан, юрекни буса – оьчлюкден, гюнчюлюкден ва ачувлукъдан сакълайыкъ.
