Игитуни – гьар бархIила гIямрулизиб
Хьунул адам ва биштIати берцахъиб
Ишди бурхIназир Дагъистайчи чедакIибти тIабигIятла гьанагарти анцIбукьуни къячхIедикибти цалра дагъистанлан кахIелун ургар илини гьанбикиб. Дигалли шагьуртазир, дигалли шимазир, дахъал заб-марка дарили, гьар бархIила гIямрулизир, бекIахъудила шуртIразир вайти асурти детаахъур.
Амма илдигъунти къиянти аги-кьяйдализиб, мякьлавсилис кумекбарес гьалакти жагьилти чебиухIели, нушала Дубуртар Улкала челябкьла шаласи бетарниличи халаси умут леб. ВегIла гIямрулис урехи акIубхIелира, къияйзи викибси цархIиллис жан дедес хIядурти саби дагъистанланти. Тяп илкьяйдали биъни марбариб гIергъити бурхIназир кадикибти анцIбукьунанира.
ХIера, илдигъунтала лугIи-лизивад сайли увухъун Сергокъалала районна УбяхI МулебкIила шилизивадси АмиргIялиев МяхIяммад МяхIяммадсягIидовичра.
Дахъал заб дарибти бурхIнала цализир Лейла бикIуси хьунул адам дурхIнира сарира машиналичир МяхIячкъалала Хушетла мякьлар сарли уррухъун. Шин чедидерхнили хъалибарглис машинализибад дурабухъес имкан аги. ИлхIели гъамли шалгIевулхъуси МяхIяммадли илди чебаиб. Хъярхъли хьунул адамлис ва дурхIнас кумекбарес дуцIухъун, илди берцахъиб. КIинайс МяхIяммадли илди сунела хъули арбукиб, мерлабариб ва кьацIли бахун.
Мижитла кьадила урши сайси МяхIяммад бегIтани уркIецIичевсили, рухIлашал дебасили, гIяхIси бяркъчевсили халаваахъни багьесли саби. Баркалла биаб илгъуна гIяхIгъабза айкьнилис.
«Дагъистан» РГВК-ла журналистличилси ихтилатлизиб биалли МяхIяммад АмиргIялиевли бурули сай: «Лерилра анцIбукьуни Кьудратла ВегIлизирад сари кадиркути. Нуни вирусигъуна барира. Къияндикибтас ЧевяхIсини, ну сабабли ветаахъурли, дила някъбачил кумекбариб. Ну игит сайра или гьанбиркули ахIен, сенахIенну лерил секIал дунъяла ВегIбекIлизирад сари дигахъути».
Илцадра уруз-хIяцIси, адаб-хIяячевси жагьил урши сай ил. Хьунул адамла ва биштIатала гIямру дерцахъибкъира, илцадра халаси гьунар дурахIеберкIнилизи халбирули саби илини сунела баркьуди.
Бахъбааб дарганти-ургаб МяхIяммадгъунти гIяхIгъубзни, Кьудратла ВегIла кири сархниличи ва адамтала гIямру гIяхIдухъахъниличи лерилра чула къайгъни дяхIчииути.
