Ца сягIят

Ца сягIят

Цагьачам мурул адам вамсурли, хIянчиличивад хъули кьанни чарухъун. Илала 5 дус виубси урши иличи унзала гьалав хIерлири.

- Дудеш, ца секIал хьарбаэс асубирару?

- Гьайгьай, бирар, се бетаурли?

- Дудеш, хIуни сецад арц кайсусири?

- Ил хIела къуллукъ ахIен! – гьимукIиб вамсурси дудеш. – Селис гIягIнили хIед ил багьурли?

- Наб ца ити багьес дигулра. Тилади саби, бура хIуни ца сягIятли чум кайсулри?

- Гьу 500 кайсулра, гIур се биубли?

- Дудеш, - уршили иличи пикричевли хIеръиб, - хIуни наб заманалис 300 гес вируду?

- ХIуни ца абдал игрушка асесу хьарбиуси?! – вявухъун дудеш. – Къалабали вякьи усес кайхьен! Илцадра хIечилацун сен пикриикIусири? Ну бархIи ахъайчи узули дебали вамсурра, хIу биалли мехIурта угьулри.

Урши сунела хъули арякьи унза кьяпIдариб. Неш кухнялизир рархибсила дарили, децIагили хьалли селра хIеиб. Дудеш биалли, гIясиикIули илав тIашли калун. ГIур кухнялизи вякьи хьунуй кабихьибси хурег алав кайиб. Камси замана дикили гIергъи ил ряхIятиуб ва пикриухъун: «Марлира, илис се-биалра асес арц гIягIнили дургар. ИлиникIун гьачамалра набзи тиладихIебариб. Биабгу селра илди 300 къуруш багьандан виштIаси урши илцад вяввирусив…»

Ил уршила хъули ацIибхIели урши бурушла кайхьири.

- Усулрив, дила урши?

- АхIенра, дудеш.

- Чевверхи набчивад, нуни сабурхIебарили вявухънилис. ИшбархIи къиянси бархIи сабри, ну вамсурра. ХIера ишди хIед арц…

Урши бурушличи кайили пишвяхъиб.

- Агь, дудеш, баркалла! – разивиуб урши.

ГIур илини гIянайурад гъучIу-мучIудиубти чумал къуруш дурасиб. Дудеш тамашавиуб. Уршили лерилра илди дархдяхъили чедетаахъили делъун ва дудешлис гьадуциб.

- Дудеш, ишар дурусли 500 къуруш арцла лер. Асубирув нуни хIела заманала 1 сягIят асес. Тилади саби, жагIял хIянчиличивад жявли вакIи, нушачил варх дугиукес. ГIур нуни хIед сагаси хIяз чебиахъис…

ПатIимат МяхIяммадова