МухIяммад Идбагла ﷺ баракатла хьунри
Умму Салама
Ил Идбагла ﷺ хьунул давлачебси хъалибарглизирадси сарри. Цайналис ил шери рякьунсири ГIябдуллагьлис, илра давлачевсири. Илди кIилилра цаибти бурхIназибал ислам дин кьабулбариб. Ил Махзум бикIуси кьамлизирадси сарри. Ил цаибти бусурмантазирад сарни багьандан Маккализиб илисра гIелабадкабиркули калунтири. Ислам багьандан илини кIина гьижра дураберкIиб, гьала-гьала ил Эфиопиялизи гечриубсири, гIур Мадинализи.
Иличил варх лерилра иличи дякьунти къиян-жапализи викибсири илала цаибил мурулра. Сари Умму Саламани бурни хIясибли, ил гIядатла ахIенси адам сайри. Дахъал думси сунечил дарх деркIибси Абу-Салам Маккализив таманкайубхIели, Умму Салама накъбачиб дурхIнира сарира сарицун калунсири. Сунела ватIайзирад гьарахъли къарширикибси бахъал дурхIнала неш, декIти гIямрула гъяжлиурси адамлис кумекла някъ гьабатурсири Абу-Бакарли ва ГIумарли, амма ил сунес кумек барахъес кьабулрикибси ахIенри. СенкIун илини сунела мурулла мер буцеси адам чеибси ахIенри. Ахирра иличи хъайчикайэс дигулра или Идбаг ﷺ дугьайзур. Ил халати кабизалачердешла регI хьунул адам Ислам багьандан лерил секIайзирад мяхIрумриубси, гIярабунала давлачебси кьамлизир дахъал думси деркIили гIергъи, къарциндешлизир хIерриэс кьабулрикес хIерири. Илис кумекбарес чебсири, илизирти халати адамдешалра кьиматла дарили, илини сунени дакIударибти къайгъни чедаили. Идбагли ﷺ иличи хъайчикайили, гамъас илгъуна кумек гIеббаахъиб, ил ва илала дурхIни сунела хъалибарг бетаахъур. ВиштIахIейчивад пякьирти гIеббурцули, цIуръабас кумекбирули калунси илини сунечи хъарбикибси чебла таманбариб. Аллагьла Расулличил ﷺ илини жагати гIямру деркIиб, иличил барх хIяж бариб, гъазаватуназир бутIакьяндеш дариб, архIябачи рашули калун.
Умму Саламара, ГIяйша кьяйдали, духусира сарри, пагьмуртачил декIаррулхъусири. Ил насихIятчи сарри, дин тIинтIбиресра илизир халати устадеш лерри. Ил Идбагличирра ﷺ дахъал секIайчи регIриуб ва лебилра хьунул адамтас дахъал гIяхIдешуни дарес бажардирикиб, чеббикIибси гьунчир дахъал сархибдешуни диахъуб. УрегцIали дусла гIямрула адам, илхIелира сунелара дурхIни лебси, бахъал дурхIни лебси гамъа хьунуйчи хъайчикайъни цархIил тяхIярли баянбарес хIейрар, ил къайгъили алавруцниван ахIи.
Идбагли ﷺ дунъя батурли гIергъира ил рахъхIи хIерриуб. Ил ребкIиб 84 дусла гIямруличир, гьижрала 60 - ибил дуслизир. Илис Абу Умаятла рурси Хинд бикIутири. Аллагь ﷻ разили калаб сунечи Аллагьла Расулла ﷺ хьунул – бусурмантала неш Умму Саламачи.
