МухIяммад Идбагла ﷺ баракатла хьунри
ХIафсат бинт ГIумар
Нушала Идбагла ﷺ авъибил хьунул, муъминтала неш ХIафсат ГIумар асхIяб ибн Хаттабла рурси сарри ва риштIахIейчирад дудешличил рарх ислам диннизирсири.
Илала цаэсил мурул Хунайс УхIудла гъазаватлизир бутIакьяндеш дарили, илар диубти дяхъурбазивад алхунсири. Илала агриличи ХIафсат дебали децIрикIусири. Ил сабабли дудешли кьасбариб ил адабчевсилис шери редес. Ил сунела рурсилис гIяхIсигъуна барес багьандан Абу Бакр асхIяблизи хьарбаэс вякьун, амма Абу Бакрли селра хIеиб. ГIумар асхIяблис ил гIяхIхIебизур ва ГIусман асхIябличи дугьаизур дила рурси хIед рука или. ГIусман асхIяблира жаваб бедили сай: Гьачам ну хъайчикайэс вирули ахIенра или. ГIумар асхIяб сунела децIра сайра Идбагличи ﷺ вакIиб ва сунела анцIбукьличила илизи буриб. ИлхIели МухIяммадли ﷺ иб: «ХIафсатлис ГIусманничив гIяхIси мурул виркур, ГIусмайс биалли ХIафсатличир гIяхIси хьунул риркур». Чумал бархIила гIергъи ил ГIумарличи сукни вакIиб ва рурсила дудешли разидеш багьахъур. Идбагли ﷺ сунела рурси Умму-Кульсум ГIусмайс шери редиб, ХIафсат биалли сунес карииб. Ил замана ХIафсат 23 дус сарри риубси.
ХIафсат Идбагла ﷺ цархIилти хьунрачи хIясадрирусири. Ил паргъатагарриубли чераибхIели, Идбагли ﷺ иб: «Илис дигули риалли, нуни ил акьуралтас». Идбагли ﷺ ца тIалакь бедили, иличил декIаркайкиб. ДекIарбикнила сабаб ХIафсатли Идбагла ﷺ ца дигIяндеш гьаргбарни сабри. Илис гIергъи ЖабрагIил малаик вакIили буриб: «Чаррара ХIафсат, ил дин дебали дигуси хьунул адам сари, дугели гIибадат бируси, хIерейс дубрурцуси. Ил хIела Алжанализирси хьунулра сари». Идбагли ﷺ ил чаррариб. Илди кIел девли ХIафсатлизиб дубрурцасли ва дехIибулта риркьасли, ралтара ибси пикри акIахъуб ва ил гьатIира рулгес ва дехIибулта риркьес рехIрихьиб. МухIяммад Идбагли ﷺ ил сунела хьунрала лугIилизир ратур. Илди 8 дус барх хIербиубтири.
Идбаг ﷺ вебкIили гIергъи Абу Бакр халифли ветаурсири. ИлхIели Кьуръан цаси табтарлизи бучибсири ва Абу Бакр Кьуръан бихIянра сайри. Ил вебкIибхIели Хафсатли бихIусири Кьуръан ва дахъал хIядисуни даахъибсири.
ХIафсат ребкIиб хIижрала 41 ибил дусла ШягIбан базлизир. Илис жаназала дехIибала дирухIели, Мадинала бекIли бекIдешдариб ва аль-Бакьи хIябрази хIяририхьиб.
