Яңы тыуған балаға исем ҡушҡанда әйтелгән теләктәр
Йә Раббым Аллаһ, атай-әсәйенә һөйөнөс булып донъяға тыуған ошо бәләкәсебеҙгә (фәлән улы фәлән, йәки фәлән ҡыҙы фәлән) тип исем ҡушылды. Ошо исем уға хәйерле исемдәрҙән, дәрәжәһен, тәүфиғын, бәхетен арттырыусы исемдәрҙән булһын!
Йә Раббым Аллаһ, ошо миҙгелдәрҙән алып был бәндәңде һәм уның ата-әсәһен күҙгә күренгән һәм күренмәгән бөтөн насарлыҡтарҙан һаҡла, күҙгә күренгән һәм күренмәгән бөтөн бәрәкәт, һөйөнөс, шатлыҡ ишектәрен ҡаршыларында ас.
Йә Раббым Аллаһ, ошо бәндәң үҙе тәүфиҡлы, иманлы, бәхетле кеше булып үҫеп, ата-әсәһенә лә күп һөйөнөстәр һәм шатлыҡтар алып килеүсе бәндәләреңдән булһын! Ошо исем ҡушыу мәжлесендә бәпескә ҡарата ниндәй изге теләктәр әйтелгән булһа, шуларҙың барыһын да ҡабул булыуын күрергә насип ит!
Өй ҡотлағанда теләй торған теләктәр
Әй, рәхимле, шәфҡәтле Раббым, ерҙәр ҙә, күктәр ҙә һинең әмереңә буйһона. Бөтөн һөйөнөстәр һәм хәсрәттәр һинең ҡулыңда! Йә, Раббым, Һин теләгән бәндәләреңә һәм теләгән ерҙәреңә бәрәкәт индерәһең. Теләһәң, ул бәрәкәттәрҙе кире алаһың.
Йә, Раббым, ошо нигеҙҙәргә бәрәкәтеңде, рәхмәтеңде, нурыңды һәм һаҡсы фәрештәләреңде индер. Ошо нигеҙҙә йәшәүсе бәндәләреңдең тәндәренә сихәт, йәндәренә тыныслыҡ, ҡәлептәренә һиҙәйәт нурын индер һәм араларына өлфәт мөхәббәт насип ит.
Уларҙың нигеҙҙәрен һәм үҙҙәрен күҙҙәр күрә алған һәм күрә алмаған бөтөн насарлыҡтарҙан һаҡла! Бигерәк тә ут бәләләренән, һыу баҫыуҙарҙан,елдауылдарҙан, ҡараҡтарҙың насар эштәренән һаҡла! Ошо нигеҙҙәрендә һөйөнөп, шатланып, киң ризыҡтар менән ризыҡланып, оҙон ғүмерҙәр йәшәүҙәрен насип ит!
Мәхмүт Шәрәфетдиндең “Доға ҡылыу һәм теләк теләү үрнәктәре китабынан”
