Аслияб гьумералде

Кьунищ – рагIи ккве

Кьунищ – рагIи ккве

Кьунищ – рагIи ккве

Аварагасул хIадисалда буго Къиямасеб къо гIагарлъиялъул гIаламатаздасан кколин рагIиги кколарел, хиянатлъиги гьабулел чагIи гIемерлъи бугин абун. Гьаб хIадис цIалидал ракIалде ккола гьеб заман тIаде щвезе жеги гIемераб мех хутIун батиларин абун.

Бихьулеб буго рагIиги кколел, хиянатги гьабуларел, ритIухъал гIадамал цIакъ къанагIат гурони хутIун гьечIеблъи. ХIатта, лъазего лъачIого, нилъгоцин ратулел руго кьураб рагIиялъе хилиплъулеллъун. Нилъеца гьеб иш тIаса-масаго таниги, рагIи ккунгутIи ккола гьереси бицин ва гьеб рикIкIуна кIудияб мунагьлъун. ТIадегIанав Аллагьас Къуръаналда абулеб буго (магIна):

«Нужеца Аллагьасеги гьесул Расуласеги гьарурал къотIаби тIуразаре, нужедаго гьоркьор гьарурал къотIабиги тIуразаре. Гьеб тIубачIезда кIал гьикъиги букIуна. Дунялалдаги ахираталдаги жавабги кьезе ккола», - ян. («Ал-Исраъ», аят 34).

Гьересиги бицунел, хиянатги гьабулел, кьураб рагIиги кколарел чагIи унго-унгоял мунапикъзаби ругин абун буго хирияв аварагасул хIадисалда. РагIи ккунгутIиялъул хIакъалъулъ рачIарал жеги гIемерал хIадисал руго. ХIакъикъияв муъминчиясе рагIи ккунгутIиялъе гIела мунапикълъиялда гьеб хурхинабулеб букIин. ЖужахIалъул тIинда, хIатта капураздасаги гьоркь, цIадулъ гIазабалда рукIине ругелги мунапикъзаби гьечIищха. Жакъа ритIухъавлъунги вукIине, кьураб рагIиги кквезе, аманаталъе кьурабги цIунизе цIакъ захIматаб иш буго.

Иблисги кьижун гьечIелъул, гьелъ хIаракат бахъула инсан кIалъалелъубцин калам берцинаблъун букIине ва гIенеккаразе лазат щвезе дагьал гьерсал тIаде журазаризе. Гьереси бициналдалъун ахираталда щолеб гIазабалъул пикру гьабуни, бичIчIула гьаб ракьалда ритIухъавлъунги рагIи кколевлъунги вукIине нусго нухалъ лъикIаб букIин метер Къиямасеб къоялъ жужахIалъул тIинда вукIинегIан.

Инсан ритIухълъиялде вачуна бихьинчилъиялъ, намус-яхIалъ, муруватлъиялъ. Гьел руго унго-унгоял бусурбабазулъ рукIунел лъикIал тIабигIатал. Балъгояб жо гуро, гьел лъикIал тIабигIатал хирияв аварагасулъ рессунги рукIана. Авараг вуго сундулъго нилъее мисал. Гьесда нахърилълъиналдалъун ТIадегIанав Аллагьасе нилъ рокьула ва мунагьаздаса рацIцIад гьарун Алжаналъуре лъугьинарула.

ЖАБИР МАЖИДОВ, «АС-САЛАМАЛЪУЛ» МУХБИР

2026-04-15 (Зул къагIида 1447 с.) №8.


ХIикматал махлукъатал

Морж   ЧIахIиял рухIчIаголъабазул цоял ккола моржал. Гьел руго тIом биццатал ва гьелъ кумек гьабула гьезие квачалдаса цIунизе. Габуралъул тIасияб рахъалъул тIом  букIуна 10 сантиметралъ биццатаб.   Гьезда кIола рекIел кьабиялъул хехлъи-хIинцIлъи жидеего бокьухъе бачине. Лъим...


Цоги аманат

Аллагьас ﷻ аманат гьабун кьуразул цояб буго чиясул сахлъи, къаркъала. Диналъги чи ахIула аманат гьабураб цIуниялде. Сахлъи цIуни ккола аманат гьабураб тIубазаби гуребги, чиясул гIумру сах-саламатаблъун букIиналъе сабабги. Аманат абураб жоги ккола нилъехъе кьураб жо кьураб куцалда нахъбуссинаби....


КIиябго рокъоб талихI щвела

Нилъер диналда ригьин гьаби буго гIадат гуребги, цIияб гIумруялде гали тIамулеб, гъваридаб рухIияб магIна жиндилъ бугеб динияб къотIи-къай.   ТIадегIанав Аллагьас ﷻ хирияб Къуръаналда абулеб буго (магIна): «ТIадегIанав Аллагьасул ﷻ хIалкIолъиялде тIоритIел гьабулел гIаламатаздасан буго гьес нужее...


Нилъехъ балагьун кьола къимат

Нилъер диналда ритIухълъи ккола цIакъ къимат бугел тIабигIатаздасан. Гьеб ккола инсанасе къимат кьолел жалазул бищун кIвар бугездасанги.   Гьеб ритIухълъиялъ жанире рачуна Аллагьасе ﷻ гIибадат гьабиялъулъ бацIцIалъи гIадал, цинги шаргIиял тIадкъаял тIубай гIадал, Аллагьасдехун бугеб...


Казбекалъулазги гьабуна кумек

Казбек районалъул жамагIаталъ, цо сордо-къоялда жаниб, бажарараб кумек гьабуна тIабигIияб балагьалъул квачIикье ккарал Хасавюрт районалъул гIадамазе.  Гьединаб кумек гьабизе ккеялъул бицун цеве вахъана районалъул имамзабазул советалъул председатель ва гьес киналго ахIана бажарарас бажарараб...