Рикьи гьабулезе кьварараб жаваб
МахIачхъалаялда, Гьудуллъиялъул минаялъуб, республикаялъул бетIерасул нухмалъиялда гъоркь тIобитIана миллатазда ва диназда гьоркьосел масъалабазул бицараб данделъи.
Гьелда гIахьаллъи гьабуна Дагъистаналъул муфти, шайих АхIмад-афандиясги.
Республикаялда парахатаб ахIвал-хIал букIинабиялъе бахъулеб бугеб хIаракаталъухъ диниял ва жамгIиял хIаракатчагIазе баркалаги кьолаго, Сергей Меликовас абуна:
«Нилъее чара гьечIого хIажат буго хадубккунги вацлъиялъулал ва гьудуллъиялъулал гьоркьорлъаби цIунизе. Нилъ рукIине ккола ватIаналъул патриоталлъун, цоцазе кумек гьабулеллъун ва щивасда бичIчIизе ккола республикаялъул букIинеселъул жавабияллъун рукIин», - ян.
Шайих АхIмад-афандица кIвар буссинабуна экстремистазулаб идеология тIибитIизе биччангутIиялде ва бицана гьелъул заралалъул хIакъалъулъ.
Сергей Меликовас баркала загьир гьабуна ДРялъул муфтиясе чIванкъотIараб хIалтIи гьабулеб букIиналъухъ ва абуна дагъистаниязда гьоркьобе ракьа рехулезе кьварараб жаваб кьезе букIиналда щибго щаклъи гьечIилан.
«Жакъа нилъеда бихьулеб буго республикаялъул ва улкаялъул тушбабаз муфтияталде гьабулеб бугеб тIадецуй. Гьединазда кколеб рагIи абизе буго ва гьединалгун цадахъ нилъ инеги гьечIо», - ян лъазабуна республикаялъул бетIерас.
