ГIадамал данде гьарулеб ифтар

Щибаб хамиз къоялъ мажгиталъур данделъула гIадамал кIал биччазе. Анкьида жаниб тIоритIулел ифтарал гIуцIула «Инсан» фондалъ, гьелъие кумек гьабула волонтераз.

Нижеца гара-чIвари гьабуна «Инсан» фондалъул вакил Мурадилгун ва цIехана гьелъулги волонтеразул гIахьаллъиялъулги хIакъалъулъ.

- Мурад, анкьида жаниб цо нухалда ифтарал тIоритIиялъул гIадат кин бижараб?

- Гьединал ифтарал нижеца цереги тIоритIулаан. Цо заманалда меценатас тIаде босана гьеб лъикIаб гIадат тIубаялъул иш ва кIигогIан соналъ халатги бахъана. Хадуб гьоркьоб къотIизеги тана. Исана июналда меценатас нижергун бухьен гьабуна ва абуна анкьида жаниб хамиз къоялъ гьарулел ифтаразул иш цIидасан тIаде босизе бокьун бугин. Гьедин байбихьана гьеб гIадат.

- Щай хамиз къо ифтаралъе тIаса бищараб?

- Хамиз ккола рузман къоялъул сордо, бусурбабазе хасаб къо. Гьеб гIужалда гIадамаз хIаракат бахъула цIикIкIун лъикIал гIамалал гьаризе ва садакъа кьезе. Гьединго хамиз къоялъул къаси гIужалда мажгиталда гьабула салават ва гьениве гIемерав чи вачIуна.

- Ифтарал лъие гьарулел, кIал ккуразегун мискин-пакъиразейищ яги…?

- Нижеца лъидаго цIехоларо кIал ккун вукIанищин яги мун мискин кколевищин абун. ХIаракат бахъула мажгиталде вачIанщинав чи кваназавизе. КIал ккураз кIал биччала какдаса хадуб, салаваталдаса хадуб хутIараб жамагIатги гъорлъе жубала. Киназего рагьарал руго нуцIби.

- Гьоркьохъеб къагIида босани, чан чи гьениве вачIунев?

- Гьоркьохъеб къагIидаялъ вачIуна 250-300 чи.

- Нус-нус чи кваназави ккола кIудияб хIалтIи. Кин хIадурлъи гьабулеб?

- ХIадурлъи байбихьула радалго. Щивав чи жинди-жиндир ишазде машгъуллъун вукIуна: цояс плов гьабула, цояс салат гьабула. Столазда лъола чамасдакI, цIибил, банан. Нижеца гьабула компот ва чай. Столалда тIад квен лъезе байбихьула маркIачIул как базе сагIат хутIидал. Гьениб кIудияб кумек гьабула волонтераз. РакI-ракIалъулаб баркалаги буго гьезие.

Хасго рехсезе бокьун буго МухIаммадхIажил цIар. Гьес кIудияб кумек гьабула ифтарал гIуцIиялъулъ ва гьел тIоритIиялъулъ.

- Анкьида жаниб гьарулел ифтаразе гIарцудалъун кумек лъица гьабулеб?

- Аслияб бутIа тIаде босун буго Москваялда гIумру гьабун вугев Раджабов Арслан АхIмадович абулев сахаватчияс. Гьев ккола «Инсан» фондалъул кумекчиги. КIудияб баркала буго гьесие.

Нижеца сундулго гьабула хIисаб ва кьола баян. Щивав чиясда бихьизабула сунда тIад кигIанасеб къадар гIарцул хвезабурабали.

- Цогидазе рес бугищ гьеб ишалде гъорлъе лъугьине?

- Буго. Лъие бугониги гIарцудалъун, кванил нигI-матаздалъун яги жидерго захIматалдалъун кумек гьабизе бокьун, ниж гьеб къабул гьабизе хIадурал руго.

Гьединго, нижеда ракIалда буго щибаб рузман къоялъ, рузманалъул какдаса хадуб, мажгиталъул азбаралда гIадамазе чай чIезабизеги.

Дагьаб цебегIан нижее кьуна «Асан» абураб компаниялъ 1500 чиясе чай хIадур гьабизе рес бугеб самовар. Аллагьас къабул гьабеги гьезул садакъа.

РакIалда буго плов гьабизеги. Гьеб бичун щвараб хайир ине буго «Инсан» фондалде, къварилъи ккаразе кумек гьабизе.

- Щиб абилеб цIалдолезда ва гIадамазе кумек гьабизе бокьаразда?

- Нижер аслияб мурад ккола рес бугел гIадамазул кумек хIажатазухъе щвезаби. Гьелдаго цадахъ нижее кIвар бугеб жо ккола гIадамазул божилъиги. Кин хIалтIи гьабулеб, кибе кумек унеб бугебали лъазе бокьарав чи нижехъе вачIине бегьула.

ЛъикIлъи гьабизе ккани, кIудиял сурсатал рукIине кколаро. Цо-цо мехалъ цо чиясул гьитIинабго бутIа цогидасе кIудияб кумеклъунги букIине бегьула.

ТIадегIанав Аллагьас къабул гьабеги щивасул садакъа.

Гара-чIвари гьабуна Жабир Мажидовас