Насигьят...
Кьасумов Амир Мирзаевич,
Жулжагъ гъул.
Дагъустан Республикайин культурайин лайикьлу работник (2004 й).
РФ-йин журналистарин Союздин член (2005 й).
РФ-йин уьмуми образованияйин лайикьлу работник (2006 й).
РФ-йин президентин грантдин сагьиб (2009 й). РФ-йин мялимарин устадвалин бина конкурсдин дипломант (1 степен, 2017 йис.)
Ихь Пайгъамбриз
(Салават ва
Салам дугъаз)
Ансарарикан сари к1ур:
-Улубкьиган
Гъиямат йигъ
Хьидва наан?
Хъюгъя узхъан.
-Сират1 гъядухъ,
Душвахь хьадарш,
Шул мизандин
Терезарихъ.
Кавсар булагъ
Йизуб ву му
Амриинди
Сар Аллагьдин –
Сабну йишвахь
Хьиди узу.
***
Абусуфьян
Аьхюр духьну,
Уч гъап1нийи
Гужли кьушум,
Гьюжум ап1уз
Хабарсузди
Мусурмнариз,
Дабгъуз ихь дин.
Угьюд дагъдин
Багахь дерккна
Кьушмар душмни,
Мурар гюзет
Ап1ури а
Аьббас халу.
Бутпересар,
Хъади кьушмар,
Уч1вна рякъюъ.
Ва Аьббасди
Хътап1ну кагъаз
Ихь Пайгъамбриз
(Салават ва
Салам дугъаз),
Ктибтури а
Мусурмнариз
Нивк1укан чан:
«Хайлин эскрар
Йихур ухькан
Шагьидарди,
Гьязур йихьай,
Ихь шагьриан
Удуч1вдархьа.
Уьрхяй кючйир
Учву, жилар,
Гъваариин
Хьиди хпарра,
Кюмек туври.
Жигьил баяр
Шагьрин гъвалахъ
Мугъаятди
Ишри гьарган».
Гьюжум ап1уз
Улихь хьайи
Гьямза халу,
Чалмайик зикв
Девегъушдин
Кидибт1найи,
Лишан ву му
Жилирвалин,
Кьягьялвалин.
Гъудган дап1ну,
Жвуми йигъан
Ихь Пайгъамбар
(Салават ва
Салам дугъаз)
Чалмайикди
Удуч1внийи
Дишла мист`ан.
Дугъу кьушмар
Шубуб йишваз
Пай гъап1нийи:
Сабпи десте –
Мухаджирар,
Мус`аб вуйи
Пайдагъ хьайир;
Ансарар ву
Кьюбпи десте –
Дидин пайдагъ
Усайддихь хьа;
Хъа шубубпиб
Вуйи десте
Хазраджарин –
Пайдагъ забгну
А Хабибди.
Кюмек вуди,
Гъюри айи
Сабсан десте –
Ву жугьдарин.
Ихь Пайгъамбри
(Салават ва
Салам дугъаз)
Суал гъап1у:
-Мусурман дин
Кьабул гъап1дар
Вуйин мурар?
-Ваъ,- гъапнийи
Жаваб вуди.
Ва дишлади
Кьяляхъ гъап1у
Дурар дугъу.
***
Ва мусурмнар
Гъушу женгназ.
Рябкъюрайи
Бина душмнин.
Планар дивну,
Архьу мурар,
Гьарсаб кьушмиз
Аьгъя гьап1руш.
Ихь Пайгъамбри
(Салават ва
Салам дугъаз)
Гъапнийи: - Шлиз
Лайикь вуйиб
Шул йиз гъилинж?
Гьерхур вуйи
Абудуджан:
-Гъаврикк ккаа,
Я, Пайгъамбар!
-Шлихьан шулу,
Му йиз гъилинж
Кьяни хьайиз
Уршвуз душман?
-Гьелбет, узхьан
Шулу дици!
Ва дугъахьна
Ихь Пайгъамбри
(Салават ва
Салам дугъаз)
Гъилинж туву.
Чалма ктибт1у,
Уч1ву дявдиъ
Абудуджан.
Уршвуз хъюгъю
Душмнин кьушмар.
Ажугъ артухъ
Шулу мугъан,
Гъазаватдин
Дяви хьибган.
***
Уч духьну а
Кьурайшитар,
Кьушмин аьхюр
Вуйи к1убан
Ва гуч1 адру
Абусуфьян.
Ансарариз
Хътап1у кагъаз:
-Учуз ккундар
Дяви ап1уз,
Чавай учуз
Халудин бай.
Багахь гъахьи
Магьа кьушмар,
Душмнарикан
Тальха к1убан
Удуч1внийи
Дюз майдандиз,
Мусурмнари
Игит Аьли
Адаънийи.
Асланарси,
Кч1иху дурар,
Сари сариз
Гъап1у гьюжум,
Магьа Аьлди
Гъиву гъилинж,
Душман иту
Жилиина.
Ихь Пайгъамбри
(Салават ва
Салам дугъаз)
Гьарай гъап1у:
-Аллагьу акбар!
Аьсгьябари
Кьюбан текрар
Гъап1у гафар
«Аллагьу акбар!»
Дяви гъабхьи
Хъана яман,
Гьямза вуйи
Уршвурайир
Душмнин кьушмар
Варт1ан к1убан:
Йирхьурпир ву
Пайдагъ хьайир,
Дахъна улихь,
Рачачури.
Ихь Пайгъамбрин
(Салават ва
Салам дугъаз)
Гъилинж хьайи
Абудуджан
Архьну айи,
Хяр убшвруси.
Сабпну яваш
Гъахьи думу,
Душмнин хпир Хинд
Дяркъну улихь,
Ис гъап1нийи
Дишла гъилинж.
Гьергуз хъюгъю
Кьурайшитар
Ва мурарин
Дишагьлийир,
Хиял ап1ин
Вуйи мурар
Убгну айи
Лиж марччарин.
***
Авчи Вахша
Ву эфиоп,
Т1ибхурайи
Ч1амч1лик кубк1рур.
Вардиз машгьур
Ва инсафсуз.
Магьа дугъу
Гъадми яракь
Дап1на гьязур
Гьямза йик1уз.
Дугъу гьамци
Ктибтуйи, к1ур:
«Гъизгъин дяви
Гъябгъюрайган,
Гьит1ик1нийза
Гъарзухъ хъайи
Гьарин гъвалахъ.
Ккилигури,
Абгурайза
Гъулай вуй вахт.
Магьа Гьямза
Ашкар гъахьи,
Дишла гъивза
Гъадми яракь.
Фун`ан тина
Гъубшу думу.
Са-кьюб къадам
Улихь гъафи
Узухьинди
Ва алдаку.
Ккуни гаф
«Ля илагьа илла Ллагь»
Гъап1у текрар,
Бедендиан
Нирси ифи
Ахмиш гъабхьи».
Ихь Пайгъамбри
(Салават ва
Салам дугъаз)
Нивгъарихьди
Марцц гъап1нийи
Дугъан майит.
Гъушу йисар,
Саб геренси.
Азад гъабхьи
Мекка шагьур.
Вахша гъахьи
Таифдиъ жин.
