Рамазан-2022. Натижйир!

Санкт-Петербург

Эгер улихь йисари Санкт-Петербург шагьриъ Дагъустандин центриъ айи мистаъ ифтIар апIури гъахьнуш, магьа му йисан аьхю ресторандиъ гъапIну. Гьаз гъапиш йислан-йисаз му ужувлан мажлисариъ-серенжемариъ иштирак хьуз ккунидарин кьадар артухъ шула. Гьаму йисан уч духьнайидарин улихь Ислам илмарин доктор Рашид Аьлимарудов ва гьацира жара аьлимар гъулхну.

Ислам илмарин доктори чан улхбаъ уч духьнайидариз гирами вазлин хусусиваларикан, заанваларикан яркьуди ктибтну. Улхбарин арайиъ нашидар гъурхнийи, бицIидарин арайиъ суалар-жавабарин конкурсар кIули гъухнийи. Гьамциб жюрейиинди СанктПетербургдиъ яшамиш шулайи табасаран халкьди ифтIар кIулиз адабгъну. Хъа ражари шлу мицдар серенжемариз дурар аьшкьниинди ккилигура. Аллагьу Тааьла рази ишри варидарикан.

Ивановский область, Кинешма шагьур

Ихь табасаран халкьдин арайиан вуйи имамар-аьлимар, наан артухъси ихь халкьдин вакилар аш, гьадушваз му гирами вазли гъягъюз чалишмиш гъахьну. Магьа нубатнан гьациб шагьур Кинешма гъабхьну. Табасаран райондин имам Ансар Рамазанов, му шагьриз душну, душваъ айи ихь вакиларихъди сатIиди ифтIар гъапIну.

Дупну ккундуки, душваъ айи ихь вакилар гьамци чпиз фикир тувбан лап шад гъахьну. Дурарира чпин терефнаан аьхю чухсагъул къайд гъапIну ва, гележегдиъ фицдар серенжемар хъанара артухъ шул кIури, умуд кивну. Хяларира чпин терефнаан дурариз чухсагъул гъапну, фицики ихь ватанагьлийири дурар заан дережайиинди кьабул гъапIну ва, фуну вахтна вушра ихь вакилар рякъюз ва кьабул апIуз гьязур вуча, гъапну.

Къайд дапIну ккундуки, Кинешмайиъ айи диндин ляхнарин улихь хьайирра ихь халкьдин арайиан вуйи, Хюрикк гъулан агьали Руслан Къурбанов вуйи. Гъит Аллагьу Тааьлайи му касди зигурайи зегьмет кьабул апIри, дугъаз хъанара ужудар хъуркьувалар туври. Амин!

Ставрополь шагьур

Ставрополиз мицдар мажлисар тешкил апIуз улхьан йисарира ният ади гъабхьну, амма гьичра кIулиз адабгъуз кьисмат шулдайи. Магьа гьаму йисан му ният кIулиз удубчIвну. Ставрополь шагьриан ва багахь хьайи шагьрар-гъулариан гизаф ихь ватанагьлийир му ифтIариз уч гъахьнийи. Мушваъ гизаф йисариинди чибчпиз дярякърайидар магьа сатIи гъахьну, хъа саспидарихъди танишра гъахьну.

Дагъустандиан дуфнайи табасаран имамар-аьлимари уч духьнайидариз яркьуди жюрбежюр темйириан гъулхну. Муфтиятдин фетвйир адагъру отделин руководитель Мугьяммад-Рамазан Ражабовди, му жилиин инсан фици яшамиш духьну ккундуш, Аллагьу Тааьлайи инсан фу бадали халкь дапIнайир вуш ва Аллагьу Тааьлайи инсандикан фу тIалаб апIураш, ктибтну. Хив райондин имам Шябан Салиховди Аллагьу Тааьлайихъ хъугъуваликан, Дугъан амрар тамам дапIну ккуниваликан яркьуди ктибтну.

Табасаран райондин имам Ансар Рамазановди сабпи нубатнаан вари уч духьнайидариз му ифтIариз уч хьпан чухсагъул къайд гъапIну. Ухьу табасаран халкь гьамци уч духьну, Аллагьу Тааьла зикир апIувал, Пайгъамбарин r тяриф апIувал, ихь халкьдин сабваликан улхувал заан ляхнарикан ву, гъапну. Серенжемдин аьхириъ уч духьнайидари аьлимариз чпин айи суалар туври, аьгъдруб аьгъю апIури, му мажлис чан аьхириз гъафну.

Рамазан-2022. Натижйир!