Ягъдигъ гъулаъ аьлимарин мажлис
4-пи июнди Мугьяммад Халиков Табасаран райондин Ягъдигъ гъулан имам вуди тасдикь гъапIнийи. Имамвалин вазифйир гъахуз хъюгъну магьа саб-кьюб гьяфта арайиан гъябгъяйизра, цIийи имамди му гъулаъ аьхю мажлис тешкил гъапIну.
18-пи июнди Ягъдигъ гъулаъ аьлимарин мажлис кIулиъ гъубшну. Му мажлисназ Дагъустандин Муфтиятдин ЮТО-йиъ айи полпред Гьюсейн Гьяжиев, Дербент шагьрин имамарин советдин председатель Аьбдулла Маликов, Дербент райондин дяъват отделин руководитель Ризван Гьябибов, райондиъ айи гъуларин имамар ва гьацира жара аьлимар иштирак гъахьну. Мажлис ачмиш апIури гъулан имам Мугьяммад Халиковди, сабпи нубатнаан, вари уч духьнайидариз чухсагъул къайд гъапну. ДумутIанна гъайри, дугъу чан улихь имамвалин вазифйир гъахури гъахьи Пирмягьяммед Керимовдизра жямяаьт бадали гъизигу зегьметнан чухсагъул гъапну ва учв вари жямяаьтдихъди сатIиди лихуз гьязур вуйиб къайд гъапIну. Мажлис кIули гъабхурайир Табасаран райондин имамарин советдин председатель Ансар Рамазанов вуйи. Дугъу, сабпи нубатнаан, Аллагьу Тааьлайикан цIийи имамдиз тавфикьвал ккун гъапIну ва гьацира жямяаьтдикан му жигьил имамдиз кюмек туври, сатIиди лихуб ккун гъапIну. Муфтиятдин ЮТО-йиъ айи вакил Гьюсейн Гьяжиевди чан улхбаъ гъи учIруди дугъужвнайи месэлйирикан гъулхну.
Асас вуди, дугъу уч духьнайидарикан веледариз фикир тувуб, дурари Интернетдиъ гьапIраш, фу сайтариъ учIвраш дикъат фикир тувуб ккун гъапIну. «Гъи саспи абйир-бабариз чпин веледари гьапIраш, фу ляхнихъ хъаш хабаркьан адар. Амма саспи дюшюшариъ ихь веледар ухьузра хабар адарди гизаф чIуру ляхнарихъ хъади шулу. Гьаддиз ккун апIурача учву веледариз фикир тувуб, дурариз ужуб тербия тувуб», - гъапну полпредди. Дербент шагьрин имам Аьбдулла Маликовди уч духьнайидариз ухьу вари Аллагьу Тааьлайихьна кьяляхъ хътакрудар вуйиваликан ктибтну. «Ихь улихь гизаф умматар яшамиш шули гъахьну. Амма гъи магьа дурарикан фужкIа имдар. Ихь улихь гизаф пайгъамбрар яшамиш шули гъахьну, амма дурарра вари Аллагьу Тааьлайин рягьматдиз гъушну. Ухьура му жилиин гьаргандиз гъузрудар дар, ухьура Аллагьу Тааьлайихьна кьяляхъ хътакрудар вухьа, гьаддиз шлубкьан ужувлан ляхнар апIури, халкьдиз хайир туври, чIурубдихьан ярхла шули яшамиш духьну ккунду», - гъапну Аьбдулла Маликовди.
Дербент райондин дяъват отделин руководитель Ризван Гьябибовди чан улхбаъ жигьилар Интернетдиъ айи саспи «аьлимарихъ» хъпехъури гьякь рякълан улдугурайиваликан ктибтну. «Саспи вахтари жигьилар Интернетдиъ гьацдар «аьлимарихъ» хъпехъуру гьякьлу аьлимариз саризкьан хабар адрударихъ. Дурариз гьаз-вуш гьацдар аьлимар кьабул шула. Жвуван гъулаъ, райондиъ ужудар аьлимар айиган, гьаз вуйкIан фуж-вуш аьгъдрударихъ хъпехъну? Фу бадали? Гьаддиз абйир-бабари веледариз дикъатниинди фикир тувуб ккун апIураза», - гъапну Ризван Гьябибовди. Сиртич гъулан имам Аьбдурашид Шихбабаевди уч духьнайидариз илим урхуваликан, илимдин заанваликан ва шлихьан илим гъадабгъну ккундуш гьаддикан уч духьнайидариз мялумат тувну. Ягъдигъ гъулан имамвалин вазифйир гъахури гъахьи Пирмягьямед Керимовди жямяаьтдикан, чав лихурайи вахтна шлизкIа гиран гъабхьнуш, хил алдабгъуб ккун гъапIну ва варидарикан цIийи имамдиз гафниинди, ляхниинди кюмек тувуб ккун гъапIну. Гьюсейн Гьяжиевди Муфтиятдин терефнаан Пирмягьямед халуйиз юкьуд йисандин муддатнаъ жямяаьт бадали гъизигу зегьметнан пешкеш тувну. Мажлис жямяаьтдихъди хъитIирхбандин гъудган апIбиинди ккудубкIну.
ИЛЬЯС АЬБДУЛЛАЕВ
